Иргэд сэрүүний улиралд хотын агаарын бохирдол, түгжрэлээс ангид байж, баярын өдрүүдэд гэр бүлээрээ аялахыг хүсдэг. Үүнтэй зэрэгцэн иргэдийн эрэлтэд нийцүүлэн аяллын компаниуд ч хөтөлбөртэй, баярын тусгай аяллуудаа зарлаж, хэдийнэ захиалга дүүрчээ. Тодруулбал, аяллын компаниуд арванхоёрдугаар сарын тусгай хөтөлбөр гаргаж, мөн гэр бүл, найз нөхөд, анги хамт олон, ажлынхнаараа аялах боломжтой маршрутыг ч нэгтгэсэн байна.

Дотооддоо баярлах, салхинд гарах, амралтын газар хоноглох 7-10 хоногийн төсвөөр гадаадад 5-7 хонох нь зардал болоод үзэх зүйл, авах мэдрэмжийн хувьд эрс ялгаатайг иргэд хэлж буй. Тиймээс 500-7,5 сая хүртэлх төгрөгийн богино болон урт хугацааны аяллыг иргэд олноор сонирхож байгаа аж.

Монголчуудын сүүлийн жилүүдэд олноор зорьж байгаа орон бол Хятад. Тэр дундаа Манжуурын таван өдрийн 350-400 мянган төгрөгийн аялал, Жининь-Хөх хотын долоон өдрийн 650 мянган төгрөгийн аяллаас эхлээд Тэнгэрийн хаалга Жанжиажэ есөн өдрийн 2,8-3 сая төгрөгийн аялал гэхчлэн эрэлттэй байгаа газрууд их байна. Хүмүүсийн ихээр сонирхож буй арванхоёрдугаар сарын аялал болон үнийн мэдээллийг нэгтгэвэл:

• Шанхай-Ханжоу хотын аялал- 2,8-3 сая төгрөг (9 шөнө, 10 өдөр),
• Манжуурт шинэ он гаргах аялал- 650-700 мянган төгрөг (7 шөнө, 8 өдөр),
• Жининь-Хөх хот- 1,1-1,2 сая төгрөг (7 шөнө, 8 өдөр),
• Манжуур-Хайлаар хотын аялал- 670 мянган төгрөг (6 шөнө, 7 өдөр),
• Датун-Хөх хотын аялал- 950 мянгаас 1,1 сая төгрөг (6 шөнө, 7 өдөр),
• Туркийн гурван хотын аялал- 4,9-5,1 сая төгрөг (7 шөнө, 8 өдөр),
• Манжуур хотын аялал- 350-380 мянган төгрөг (5 шөнө, 6 өдөр),
• Тайландын Пукет арлын аялал- 4,9-5,5 сая төгрөг (7 шөнө, 8 өдөр),
• Дубай хотын аялал- 6,5-6,7 сая төгрөг (6 шөнө, 6 өдөр),
• Бангкок-Паттаяа аялал- 5,2-5,4 сая төгрөг (7 шөнө, 8 өдөр),

Дээрх аяллуудын хувьд арванхоёрдугаар сарын 20-ноос хойшхи захиалгууд нь ихэвчлэн захиалга дүүрсэн болохыг аяллын компаниуд хэлж байна. Учир нь хүмүүс гол төлөв чөлөөт болон хөтөлбөртэй аяллыг гэр бүлээрээ захиалжээ. Шанхай-Ханжоу хотын аялал дээр жишээ авахад нийт үнэ нь нэг хүний гурван сая төгрөг бөгөөд тус төлбөрт буудал, аяллын хөтөч, унаа, хөтөлбөрт багтсан хоол, аяллын даатгал зэрэг багтжээ. 6-оос дээш насныхан тус төлбөрөөр аялах бол 5-аас доош насныхан 750 мянгаас 2,1 сая төгрөгөөр аялах юм.

Харин Манжуурт шинэ он гаргах аяллын маршрутын хувьд Улаанбаатар-Налайх-Багануур- Хэнтий-Дорнод-Хавирга боомт- Алтан эмээлт-Манжуур хот. Нийт 2100 км зам туулах газрын аяллын үнэ 650 мянган төгрөг байна.

Иргэд энэ үеэр дотоодод аялах боломжгүй учир олон хоногийн аялалд явахыг илүүд үзэж байгаагаа ч хэлж байгаа юм. Тиймээс энэ өвөл өнгөрсөн жилүүдээс илүү гадаадын аялал эрэлттэй байгаа аж.