Энэ долоо хоногт ихэнх нутгаар цаг агаар эрс хүйтрэхийг Цаг уур орчны шинжилгээний газар, Онцгой байдлын газраас анхааруулж буй. Өчигдрөөс орон нутгийн замуудад халтиргаа гулгаа их үүсч, замууд мөстсөн бөгөөд энэ үеэр хурд хэтрүүлснээс осол хэд хэд гарсан бол малдаа явж байхдаа төөрч, сураггүй болсон хүмүүс ч байгаа юм. Тиймээс хол замд зорчихдоо анхаарал болгоомжтой зорчихыг зөвлөж байна. Мөн өчигдөр /2023.11.21/ 23:00 цагаас орон нутгийн чиглэлийн зарим замд хөдөлгөөнийг түр хугацаанд хязгаарлаад байсан.

Авто тээврийн үндэсний төвөөс өгсөн мэдээллээр, арваннэгдүгээр сарын 22-ны өглөөний байдлаар нэг чиглэлд зам хаасныг нээсэн бөгөөд нийт дөрвөн чиглэлд хүчтэй цасан шуургатай байна гэсэн юм.

• А0401 дугаартай Дархан-Улаанбаатар,
• А0301 дугаартай Улаанбаатар-Арвайхээр чиглэлийн авто замуудад хүчтэй цасан шуурга шуурч байна.

Мөн А1001 дугаартай Дархан-Эрдэнэт, А1002 дугаартай Эрдэнэт-Булган чиглэлийн авто зам дагуу цас ороогүй хэдий ч салхи хүчтэй салхилж байгааг анхаарууллаа. Одоогийн байдлаар бусад нутгаар цаг агаар тогтуун, авто замаар зорчих тээврийн хэрэгслийн хөдөлгөөн хэвийн үргэлжилж байна гэв.