Байдены засаг захиргаа АНУ-ын цагаачлалын албаны хүмүүсийн багийг Панам руу илгээхээр төлөвлөж байгаа бөгөөд Төв Америкийн улсаар дамжин ирж буй цагаачдыг шалгаж, албадан гаргахад орон нутгийн эрх баригчдад туслахаар төлөвлөж байна.  Дотоодын аюулгүй байдлын яамнаас тусламж хүссэн Панамын засгийн газартай эцсийн тохиролцоонд хүрснээр орогнол хүсэгчдийг шалгаж, цагаачдыг албадан гаргах туршлагатай албан тушаалтнуудын багийг илгээхээр болжээ.

Зорилго нь АНУ-ын Иргэний харьяалал, цагаачлалын алба, Цагаачлал, гаалийн хяналтын алба зэрэг янз бүрийн агентлагуудын ажилтнуудыг сургаж, Панамын эрх баригчдад тус улсыг Өмнөд Америктай холбодог ширэнгэн ой болох Дариен Гап руу чиглэсэн цагаачдын онцгой урсгалтай тэмцэхэд нь туслах аж.

Панамын засгийн газрын мэдээллээс харахад, энэ жил бараг 500,000 цагаач /тал  хувь нь эмэгтэйчүүд, хүүхдүүд/  нэвтэршгүй гэгддэг байсан ширэнгэн ойг явганаар туулан тус улсад иржээ.  Цагаачдын дийлэнх нь Венесуэлээс ирсэн бөгөөд сүүлийн жилүүдэд өргөн хүрээг хамарсан эдийн засгийн хямрал, авторитар дэглэмээс зугтахын тулд сая сая иргэд нь дүрвэж байна.

Байдены засаг захиргаа Панамын албан тушаалтнуудад цагаачдыг хүмүүнлэгийн хамгаалалтад хамруулж, шаардлага хангаагүй хүмүүсийг албадан гаргахад сургах төлөвлөгөөтэй байна. Мөн Панамыг албадан гаргах үйл ажиллагаагаа идэвхжүүлэхийн тулд засгийн газрын гэрээ байгуулахад туслахаар төлөвлөжээ.

Энэхүү шинэ санаачилгыг АНУ-ын Төрийн департаментын сангаас санхүүжүүлнэ. Панам, АНУ хоёр албан ёсны хэлэлцээрийг эцэслэн байгуулсны дараа л эхлэх гэнэ.

ЭХ СУРВАЛЖ: CBS NEWS