Израилийн хүчин Газын зурвас дахь Аль-Шифа эмнэлгийг бүсэлсэн талаар бид мэдээлсэн. Тэгвэл өнөөдрийн байдлаар бүс нутгийн хойд хэсэгт байрлах индонези эмнэлгийг мөн Израиль эзлээд байна. Тус эмнэлэг өнөө өглөө бөмбөгдөлтөд өртөж, 10 гаруй хүн нас баржээ. Израилийн хүчин барилгаас 20 орчим метрийн зайд байрласан байгааг эмнэлгийн дарга Марван Аль-Султан хэлэв.

Харин Аль-Шифа эмнэлгээс дутуу төрсөн 31 нярайг нүүлгэн шилжүүлэх шаардлагатай байгаа аж. 39 хүүхэд байсан ч зарим нь хэдийнэ амиа алджээ. ЮНИСЕФ-ийн ажилтан Тоби Фрикер хэлэхдээ "Энэ бол маш аюултай, хүнд даалгавар. Газад аюулгүй газар гэж байхгүй. Эмнэлгүүд бүгд ачаалалтай байгаа тул хүүхдүүдийг Египетрийн эмнэлэгт шилжүүлэх хэлэлцээр үргэлжилж байна. Бид эдгээр хүүхдийн ар гэрийг олж тогтоохоор ажиллаж байна. Гэр бүлээс нь бүрэн салгачихыг бас хүсэхгүй байна" гэлээ.

Израилийн арми Аль-Шифа эмнэлэгт халдсанаа зөвтгөх зорилготой хоёр бичлэг нийтэлсэн байна. Нэг бичлэгт нь Хамасын командлалын төв байр руу ороход ашигладаг хонгилын амыг харуулжээ. Харин нөгөө бичлэг нь барьцааны хоёр хүнийг харуулсан нууц камерын бичлэг байв.

Барьцаанд байгаа хүмүүсийн тухайд АНУ, Катарын оролцоотой хэлэлцээрт нааштай шинж тэмдэг ажиглагдаж эхэлжээ. Ойрын өдрүүдэд түр хугацаанд гал зогсоож, тодорхой тооны барьцааны хүнийг суллах магадлал байгааг АНУ дахь Израилийн Элчин хэлэв.

Эх сурвалж: BBC