Монголын загварын ертөнцийнхний хамгийн нэр хүндтэй "Гоёл" наадам өчигдөр /2023.11.19/ "Шангри-Ла" зочид буудлын эвент холл танхимд болж, шилдгийн шилдгүүдээ тодрууллаа. Монголын дизайнеруудын холбооноос зохион байгуулдаг 36 дахь удаагийн наадмаар Монголын он оны топ модель, шилдэг дизайнерууд, шилдэг моделиуд, шилдэг үсчин, шилдэг нүүр будагч артистуудыг шалгаруулдаг билээ. Энэ жилийн "Гоёл" наадмын отгон топ моделиор Амарсанаагийн Сайхантамир тодорсон юм.

Ингээд шинэхэн топ модель А.Сайхантамирын товч танилцуулга, түүний гаргасан амжилтуудаас онцлон танилцуулъя.

• 1995 оны зургадугаар сарын 25-ны өдөр төрсөн.
• Эцэг эхээс 10-уулаа.
• Хэнтий аймагт төрж өссөн, буриад ястан.
• Ёочин хөгжмөөр 14 жил хичээллэж, багаасаа урлагийн боловсрол эзэмшиж өссөн.
• Мисс, загвар өмсөгч бүсгүй 2016 онд Шинжлэх ухаан технологийн их сургуулийг эрчим хүчний инженер мэргэжлээр төгссөн.
• Анх 16 настайдаа Шилмэл загварын ордонд Г.Нармандах, Э.Сэлэнгээ багшийн шавь болж байжээ.
• Тэрбээр анх удаа “Мисс-Монголиа 2014” тэмцээнд оролцож, 18 настайдаа загварын ертөнцөд хөл тавьсан.
• Мөн 2014 онд болсон “Манжуурын мисс” тэмцээнд оролцож, гуравдугаарт шалгарахаас гадна “Шилдэг үндэсний хувцас” номинацийн эзэн болсон.
• Дараагаар нь “Буриадын мисс” тэмцээний тэргүүн миссээр шалгарч байжээ.
• Мөн “Гоёл-2016” наадамд оролцож, дэд байрын шагналыг хүртэж байсан.
• "Дэлхийн авьяаслаг мисс”-ийн тэмцээнд оролцож, дэд байр эзэлсэн амжилтыг үзүүлжээ.