Улирлын чанартай томуугийн дархлаажуулалтад жил бүр зорилтот бүлгийнхнийг үнэ төлбөргүй хамруулдаг. Гэвч жирэмсэн эхчүүдийн вакцинд хамрагдах идэвх сул байгаа юм. Энэ талаар болон томуугийн дархлаажуулалтад хамрагдах иргэд юуг анхаарах ёстой талаар ХӨСҮТ-ийн Дархлаажуулалтын албаны дарга О.Дашпагамаас тодрууллаа. 

-Томуугийн дархлаажуулалтын хамрагдалт хэдэн хувьтай байна вэ?

-Жил бүр хүйтэн сэрүүний улиралд томуугийн вакциныг зорилтот бүлгийнхэнд үнэ төлбөргүй хийдэг. Тухайлбал, томуугаар өвчлөх хамгийн эрсдэлтэй бүлэг болох тав хүртэлх насныхан, 65-аас дээш насныхан, жирэмсэн эмэгтэйчүүд, эмч, эмнэлгийнхэн болон ажил үйлчилгээний шаардлагаар мэргэжилтнүүдийг вакцинд хамруулах ажлыг зохион байгуулдаг. Томуугийн эсрэг вакциныг дэлхий дээр гурван тунт болон дөрвөн тунтаар хийж байгаа.

Ерөнхийдөө томуугийн өвчин үүсгэгч дөрвөн вирусын эсрэг вакцинууд үйлдвэрлэгдэж байгаа. Монгол Улс сүүлийн жилүүдэд дөрвөн цэнт томуугийн вирусын вакциныг хийж байна. Нийтийн дунд түгээмэл өвчлөл үүсгэж байгаа дөрвөн хэв шинжээс сэргийлэх зорилгоор дархлаажуулалтыг хийж байгаа гэж ойлгож болно.

Вакцинжуулалтад зөвхөн зорилтот бүлгийнхнийг хамруулж байгаа бөгөөд одоогоор 85 хувьтай байна. 2-5 насныхан 80 хувьтай, 65-аас дээш насныхан 100 хувь, жирэмсэн болон ажил үйлчилгээний шаардлагаар хамрагдах хүмүүсийн хамрагдалт харин харьцангуй бага байгаа юм. Нийт 21 аймаг, есөн дүүрэгт томуугийн дархлаажуулалт хийж байна.

-Зорилтот бус бүлгийн иргэд ХӨСҮТ-д очиж, сайн дураар томуугийн дархлаажуулалтад хамрагдах боломжтой юу?

-Дээрх хэлсэн зорилтот бүлгийнхэнд дархлаажууалт үнэ төлбөргүй. Харин сайн дураар хамрагдах хүсэлтэй иргэд ХӨСҮТ болон өрхийн эмнэлэг дээр очсон ч хамрагдах боломжгүй.

Өнгөрсөн жил мөн сайн дураар хамрагдах иргэдийг бид томуугийн дархлаажуулалтад хамруулаагүй.

Ерөнхийдөө зорилтот бүлгийнхнийг урьдчилан сэргийлэх үүднээс томуугийн вакциныг хийж байгаа.