Газын зурвас дахь хамгийн том эмнэлэг Аль-Шифагийн эргэн тойронд мөргөлдөөн ширүүссэн талаар бид өмнө нь мэдээлсэн. Эмнэлгийн хүчилтөрөгчийн нөөц дуусч, инкубатор дахь нярай хүүхдүүдийг өөр хэсэгт шилжүүлэхээс өөр аргагүйд хүрч байна. Дутуу төрсөн нярай хүүхдүүдийг амьд үлдээхийн тулд тугалган цаасаар ороож, халуун усны дэргэд байрлуулах арга хэмжээ авч байгааг эмнэлгийн дарга Мухаммед Абу Салмия хэллээ.

"Дутуу төрсөн хүүхдүүдийг амьдруулахын тулд эхийн хэвлийтэй нь ижил температурт байлгах шаардлагатай. Энэ температурыг зөвхөн инкубатор л бий болгож чадна. Өвөл хаяанд ирэхээр байдал улам дордоно" гэж эмнэлгийн ажилтан хэлжээ.

Эмч нар лааны гэрэлд ажиллаж, эмнэлэг доторх хүмүүс усны хоолойн уснаас ууж эхэлжээ. Харилцаа холбоо тасалдсан учир эмнэлэгийн хашаанд юу болж байгааг ч хүмүүс мэдэх боломжгүй байна. Аль-Шифа дахь чөлөөт сэтгүүлч хэлэхдээ "Хэн ч эндээс гарч зүрхлэхгүй байна. Энд байгаа хүмүүс эмнэлгийн эргэн тойронд юу болоод байгааг мэдэж байгаа. Агаарын цохилтоос болоод утаа гарч байгааг бид харж байна. Түргэн тусламжийн машинууд ч эндээс гарахгүй байгаа. Учир нь сүүлийн өдрүүдээд түргэний машин эмнэлгээс гарах замдаа цохилтод өртсөн явдал гарсан" гэлээ.

Өдгөө Аль-Шифа эмнэлэг дотор 1500 орчим өвчтөнөөс гадна 7000 дүрвэгч байна. Сүүлийн өдрүүдэд энд 15 өвчтөн нас барсны зургаа нь нярай хүүхэд байжээ.

Израилийн хүчин Ням гаригт эмнэлгийн үүдэнд 300 литр түлш тавьсан ч түүнийг авахыг Хамасынхан хориглосон гэв. Гэхдээ энэ 300 литр түлш нь эмнэлгийг 30 минут ажиллуулахад ч хүрэлцэхгүй аж. Тус эмнэлэг үүсгүүрээ тэжээхийн тулд цаг тутамд 600 литр түлш шаардлагатай юм байна.

Аль-Шифа эмнэлгийн доор Хамас бүлэглэлийн командлалын төв байдаг гэж Израиль удаа дараа мэдэгдсэн ч Хамас болон эмнэлгийн албаныхан үүнийг үгүйсгэж байна. Харин АНУ-ын албаны хүн Даваа гаригт Аль-Шифа эмнэлгийн доор Хамасын командын төв бий гэж мэдэгдэв. 

Эх сурвалж: CNN