Палестиныг дэмжсэн жагсаал АНУ, Их Британи, Турк зэрэг олон улсад өрнөсөн. Тэгвэл сүүлийн өдрүүдэд Их Британийн нийслэл Лондон дахь жагсаалын цар хүрээ томорч, Бямба гаригт л гэхэд 300 мянга гаруй хүн жагсчээ. Цагдаа нар нөхцөл байдлыг хянахын тулд 126 жагсагчийг баривчилсан байна.

Жагсагчид "Палестиныг чөлөөл", "Яг одоо гал зогсоо" гэх мэт уриа лоозон барьжээ. Мөн зарим нь "Голоос далай тэнгис хүртэл Палестин эрх чөлөөтэй болно" гэж хашгирч байв. "Украиныг дэмжиж байгаа атлаа Палестиныг дэмжээгүй хүмүүсийн хоёр нүүрийг гайхаж байна. Зарим улстөрч бидний талд байгаа ч дуугарахаас айдаг" гэж нэгэн жагсагч хэлжээ. Жагсагчдын тоо олширч буй нь тэдэнд урам зориг өгч байгаа аж.

Дэлхийн нэгдүгээр дайн дууссаныг тохиолдуулан Их Британид жил бүрийн арваннэгдүгээр сарын 11-ний өдрийн 11:00 цагт хоёр минут чимээгүй зогсдог.

Жагсагчид энэ өдөр дайны дурсгалын хөшөө рүү дайрахыг оролджээ. Мөн 150 хүний бүрэлдэхүүнтэй багийг жагсаалын төгсгөлд ёслолын буудлага буудуулж байхад нь цагдаа нар саатуулсан байна. Ёслолын буудлагын цог зарим цагдаагийн нүүрэн дээр унажээ.

Жагсагчдын ёс зүйгүй байдлыг ерөнхий сайд Риши Сунак буруушаав. "Палестины төлөөх үндэсний жагсаалд оролцож буй бүлгүүд болон Хамасыг дэмжигчдээс гарч буй хүлээн зөвшөөрч боломгүй хүчирхийллийг би буруушааж байна. Цөөнхийн жигшүүрт үйлдэл нь үзэл бодлоо тайван замаар илэрхийлж буй хүмүүсийг харлуулж байна. Бүх гэмт хэргийг хуулийн дагуу түргэн шуурхай шийдэх ёстой. Тэдэнд хариуцлага хүлээлгэх ёстой гэдгийг би цагдаагийн газрын даргад хэлсэн" гэж Сунак хэллээ. Мөн тэрбээр биднийг эрх чөлөөтэй амьдрахын тулд маш их зүйлээ золиосолсон хүмүүсийн дурсгалд хүндэтгэлгүй хандсан гэж жагсагчдыг буруушаажээ.

Их Британийн Дотоод хэргийн сайд Суэлла Браверман цагдаа нарыг жагсагчдад хэтэрхий зөөлөн хандсан гэж мөн буруутгав. 

ЭХ СУРВАЛЖ: CNN