ОХУ-ын ерөнхийлөгч Путин Пүрэв гаригт Казахстанд айлчилсан. Тэрбээр айлчлалын үеэр Казахстаны ерөнхийлөгч Касым-Жомарт Токаевын нэрийг хэд хэдэн удаа буруу дуудсаныг хэвлэлүүд онцоллоо.

Путиныг Пүрэв гаригийн өглөө Астанад онгоцноос буухад Касым Токаев угтаж авсан. Албан ёсны угтах ёслол үдээс хойш Акорда ордонд болжээ. Ёслолын ажиллагааны дараа ерөнхийлөгчид Казахстаны хойд хэсгийн Костанаяд зохион байгуулагдаж буй 19 дэх удаагийн Бүс нутаг хоорондын хамтын ажиллагааны форумыг цахимаар нээв.

Албан бус уулзалтын үеэр Токаев ОХУ-ын ерөнхийлөгчид хандан "Өнөө өглөө таныг Астанад ирэхэд тэнгэрт хавирган сартай, тод одод түгсэн байсан. Энэ бол ховор үзэгдэл. Энэ бол сайн сайхны дохио гэж би бодож байна" гэжээ.

Харин Путин Казахстаны ерөнхийлөгчийн нэрийг хурдан хэлэхийг хичээсэндээ юу, хэд хэдэн удаа буруу дуудав. Эхлээд Бүс нутаг хоорондын хамтын ажиллагааны форумыг нээх үеэр Токаевын овгийг Кемелевич гэхийн оронд Келемич гэжээ. Дараа нь Астанад урьсанд нь талархал илэрхийлэх үедээ "Кемел Жомартович" гэж буруу хэлээд, тэр даруй залруулсан байна.

Путин анх удаа ийм алдаа гаргаж байгаа юм биш. Тэр 2022 оны нэгдүгээр сард Хамтын аюулгүй байдлын гэрээний байгууллагын цахим хурлын үеэр "Камел Жомартович" гэж хэлсэн. Дараа нь өнгөрсөн сарын 13-ны өдөр Тусгаар улсуудын хамтын нөхөрлөлийн дээд хэмжээний уулзалтын үеэр мөн л Токаевын нэрийг буруу дууджээ. Тэрбээр Токаевт хандаж, орос хэлийг сурталчлах олон улсын байгууллага байгуулах санаачлагыг нь сайшаасан боловч нэрэн дээр дахин бүдэрсэн байна.

Казахстан, Орос хоёр улс 2013 оны арваннэгдүгээр сарын 11-нд "Сайн хөрш, эвслийн тухай гэрээ"-г байгуулж байв. Энэхүү гэрээний 10 жилийн ойгоос хоёрхон хоногийн өмнө Путин ийнхүү Казахстанд айлчилжээ. 

Эх сурвалж: UKRAYINSKA PRAVDA