Энэтхэг улс Оросын газрын тос хөнгөлөлттэй үнээр импортолсноор энэ оны эхний есөн сарын байдлаар 2.7 тэрбум ам.доллар хэмнэжээ. Барууны орнууд Оросын газрын тосыг худалдан авахгүйг эрмэлзэж буй цаг үед Энэтхэг улс Оросын түүхий нефтийн гол худалдан авагч болсон. Тус улс энэ оны эхний есөн сард Оросоос 70 сая орчим тонн газрын тос импортолжээ. Энэ нь өдөрт 1.85 сая баррелийг импортолсон гэсэн үг юм.

Оросын нийлүүлэлтийн дундаж үнэ харьцангуй хямд буюу тээвэрлэлт, даатгал зэрэг нь ороод нэг тонн тутамд 525.60 ам.доллар байсан. Энэ нь Энэтхэгийн хувьд Ойрхи Дорнодын импортоо бууруулах боломж болжээ. Гэтэл энэ хугацаанд Оросын газрын тостой харьцуулж болохуйц чанартай Иракийн нефтийн үнэ дунджаар 564.46 ам.доллар байв. 

Барууны хориг арга хэмжээнээс улбаатайгаар ОХУ нь Энэтхэг тэргүүтэй бусад зах зээлд төвлөрч ажиллан, нефтиэ хямд үнээр нийлүүлэх болсон. Гэсэн хэдий ч хөнгөлөлтийн хэмжээ бусад ханган нийлүүлэгчтэй харьцуулахад жигдэрч эхэлсэн тул аравдугаар сард Энэтхэгийн импортын хэмжээ бага зэрэг буурчээ.

Дашрамд дурдахад, ОХУ, Саудын Араб тэргүүтэй томоохон экспортлогчид оны эцэс хүртэл түүхий нефтийн олборлолтоо хязгаарлана гэж мэдэгдсэнээр үнэ өсөх төлөвтэй байна.

Эх сурвалж: THE KYIV INDEPENDENT