Газын зурвасын хойд хэсэгт өдөрт дөрвөн цагийн хугацаатай гал зогсоох хэлэлцээрийг Израиль хүлээн зөвшөөрчээ. Ингэхдээ чухам хэдэн цагт гал зогсоохыг Израилийн тал гурван цагийн өмнө мэдэгдэх аж. Энэ нь Газын зурвас дахь хүмүүнлэгийн хямралыг намжаах эхний алхам болж байна. Дөрвөн цагийн завсарлага нь өдөр бүр тодорхой газар нутагт байх юм.

Израилийн ерөнхий сайд Беньямин Нетаньяху барьцааны хүмүүсийг суллахаас нааш гал зогсоох хэлэлцээр хийхгүй гэж удаа дараалан мэдэгдээд байсан билээ.

АНУ-ын ерөнхийлөгч Жо Байден Даваа гаригт Нетаньяхутай утсаар ярих үедээ харьцангуй урт хугацаанд завсарлага авахыг шаардсан байна. Тэрбээр гурваас ч олон өдрөөр завсарлага авахыг шаарджээ. Мөн дөрвөн цагийн завсарлага авах шийдвэрийг АНУ-ын засаг захиргааны асар их оролцоотойгоор гаргасан гэдгийг Үндэсний аюулгүйн зөвлөлийн хэвлэлийн төлөөлөгч Жон Кирби хэллээ.

Түүнчлэн иргэдийг аюулгүй газарт нүүлгэн шилжүүлэх хоёр дахь гарц нээгдсэнийг Пүрэв гаригт Байден мэдэгджээ. Тактикийн завсарлагын үргэлжлэх хугацаа болон давтамжийг Израилийн талтай үргэлжлүүлэн ярих юм байна.

Эх сурвалж: CNN