Польшийн тээвэрчид даваа гаригт Украинтай хиллэдэг гурван боомт руу орох замыг хаажээ. Оросын түрэмгийлэл эхэлснээс хойш Украины ачааны машинууд Польшийн хилээр нэвтрэх зөвшөөрөл авахаас чөлөөлөгдсөн. Үүнтэй зэрэгцээд Орос, Беларусийн пүүсүүд Польшийн аж ахуйн нэгжүүдийг зохицуулах болжээ. Тиймээс дайны цагт гадаадын өрсөлдөгчдөд бизнесээ алдаж байна гэж жолооч нар үзжээ. Мөн үүнийг засгийн газрын идэвхгүй байдал гэж дүгнэж байна.

Жолооч нар Украинд бүртгэлтэй ачааны машинуудын Польш руу нэвтрэх хязгаарлалтыг сэргээх, Европын холбооноос гадуурх хөрөнгө оруулалттай тээврийн компаниудыг хориглох зэрэг шаардлага тавьж байна. 

"Польшийн тээвэрлэгчид Беларусь, Орос, Украины компаниуд хяналтгүй орж ирж байгааг эсэргүүцэж байна. Үүнээс болж зүүн капиталтай компаниудын тээвэрлэлт тасалдсан" гэж тээврийн компанийн дарга Карол Рычлик хэлжээ. Тээвэрчид өөрсдийнхөө нөхцөл байдлыг үр тарианы импортын үеэр гомдол гаргасан Польшийн тариаланчидтай харьцуулав. 

Тээвэрчдийн эсэргүүцэл нь хоёр орны ашиг сонирхол, эдийн засагт хохирол учруулж, экспортод саад учруулж байна гэж Украины Дэд бүтцийн сайд Александр Кубраков хэлжээ. Мөн хоёр орны тээвэрлэгчдийн ашиг сонирхлыг харгалзан үзэх бүтээлч яриа хэлэлцээ хийхэд бэлэн байна гэлээ. 

Украинтай хиллэдэг гурван боомтоор өдөрт хэдэн зуун ачааны машин дамжин өнгөрдөг. Жагсагчид цагт нэг ачааны машин нэвтрүүлж байна. Мөн хүмүүнлэгийн тусламж, дэгдэмхий бодис, малын тээвэрлэлт зэрэг зарим ачааг хориггүй нэвтрүүлж байна. Украины Дэд бүтцийн яамнаас мэдээлснээр, хоёр улсын нийт найман боомт байгаа бөгөөд үүгээр сард дунджаар 40-50 мянган ачааны машин нэвтэрдэг. Энэ нь дайны өмнөх үеэс хоёр дахин их тоо юм. Украин улс Польшийн хилээр дамжуулан бусад бүх хөршөө нийлүүлсэнтэй тэнцэх хэмжээний бараа бүтээгдэхүүн экспортолж байна.

Эх сурвалж: REUTERS