Украины тэнгэр улаан өнгөтэй болжээ

Украины хэд хэдэн мужид Ням гаригийн орой агаар мандлын ховор үзэгдэл болох хойд зүгийн улаан туяа тодорчээ. Энэхүү үзэгдлийн зургийг Харьковын одон орон судлаач Володимир Кажанов цахим хуудсандаа нийтэлсэн байна.

Улаан туяа Киев мужийн хойд хэсгээр тод харагдсан бөгөөд Буча хотын зөвлөлөөс мөн энэ тухай мэдээлж, гэрэл зургийг нийтэлжээ. Үүнээс гадна Донецк мужид энэхүү үзэгдэл ажиглагдсаныг Краматорск хотын зөвлөл мэдээлсэн байна. Харьков, Чернигов, Одесса, Кировоград, Запорожье, Херсон мужуудад мөн улаан тэнгэр харагджээ.

Харьковын одон орон судлаач Володимир Кажанов Украины янз бүрийн мужуудад харагдах улаан тэнгэрийг геомагнитын шуургатай холбоотой гэж тайлбарлажээ. Тодруулбал, тэрбээр "2023 оны арваннэгдүгээр сарын 5-6-нд шилжих шөнө Украин болон дэлхийн бөмбөрцгийн хойд хагасын олон улсад туйлын туяа ажиглагдлаа! Яг энэ мөчид Европын хойд хэсэгт ч мөн адил уг үзэгдэл болж байна. Хэдхэн хоногийн өмнө наран дээр болсон титмийн массын хөөрөлтөд манай гариг өртсөний улмаас хүчтэй геомагнит шуурга боллоо" гэсэн байна.