Хиймэл оюун ухаан буюу дэлхий нийтийн хэлж заншсан "AI" гэх товчлол 2023 оны "Collins"-ын оны шилдэг үгээр шалгарчээ. "Collins Dictionary"-ын судлаачдын мэдэгдсэнээр "AI" гэдэг үг 2023 оны зонхилох сэдэв байсан гэв. Үг хэллэгийн мэргэжилтнүүд Коллинз Корпус гэх дэлхийн өнцөг булан бүрт байгаа цахим сүлжээ, сонин, сэтгүүл, номын мэдээллийн санд дүн шинжилгээ хийжээ. Коллинз Корпус мэдээллийн санд 20 тэрбум гаруй үг байна. Радио, телевиз гэх мэтийн материалд тулгуурлан тус санд сар бүр шинэ мэдээлэл ордог аж. 

Түүнчлэн "nepo baby" гэдэг үг "Collins"-ын жагсаалтад багтжээ. Энэ нь эцэг эхтэйгээ адил салбарт амжилтад хүрсэн хүүхдүүдийг дүрсэлдэг хэллэг юм. Мөн аливаа хямралын үед ашиг олдог компаниуд гэсэн утгатай "Greedflation", утааны ялгаруулалт багатай бүсийг илэрхийлдэг "Ulez" гэх үгс мөн багтсан байна. Зарим арилжааны бүтээгдэхүүнээс зайлсхийхийг олон нийтэд анхааруулах гэсэн утгатай "deinfluencing" гэдэг үг ч багтжээ. 

Өмнөх оны шилдэг үгүүдээс дурдвал, 2016 онд "Brexit", 2020 онд "lockdown", 2022 онд "permacrisis" гэсэн үгс байсан. "Permacrisis" нь тогтворгүй, найдваргүй байдал удаан үргэлжлэх буюу мөнхийн хямрал гэсэн утгатай үг юм. 

Эх сурвалж: JAPAN TODAY