УИХ-ын Төсвийн байнгын хороо өнөөдөр /2023.11.01/ хуралдаж НӨАТ-ын буцаан олголтыг 5 хувь болгох асуудлыг хэлэлцэж байна. Энэ үеэр гишүүд байр сууриа илэрхийлж байна.

Төсвийн байнгын хорооны дарга Г.Тэмүүлэн “Иргэдээс гаргасан саналыг судлах, шаардлага бол хуулийн төсөл оруулж ирэх, НӨАТ-ын хамрагдалтыг нэмэгдүүлэх, цаашид бизнесийн орчин, татварыг бууруулахад судалгаа хийж, шаардлагатай бол ажлын хэсэг байгуулах тогтоол оруулж ирж байна. НӨАТ-ын асуудлыг судалж ул суурьтай шийдвэр гаргах саналтай байна.

УИХ-ын гишүүн Ж.Батсуурь “Ажлын хэсэг байгуулагдаж байна. Татварыг үе шаттай бууруулах асуудал бодлогоор хийгдэх ёстой. Төсөв өргөн баригдсан хойно 400-500 тэрбумаар бужигнуулах нь буруу. Төсөв тусгаар тогтнолын баталгаа. Төсвөө баталж чадахгүй бол УИХ тардаг заалттай. Хөрөнгө оруулалт газар дээр үлдэнэ. Буцаан олголт бол үр ашиггүй дуусна. Үе шаттай татварыг бууруулах нь төрийн хар хайрцгийн бодлогоор явуулах ёстой. Эрүү, татварын хуулийг иргэдээс асуух нь буруу жишиг. Гурван сая иргэн та нарт түгжрэлээ шийдэхийг өдөр бүр хэлж байна. Төсөв өргөн баригдсан хойно НӨАТ-ыг оруулж ирж байгаа нь төсвийн тогтворгүй байдлыг үүсгэнэ. Нийтдээ хувийн хэвшил, баялаг бүтээгчдийг дэмжсэн үйлдвэрлэлийг дэмжих, татварыг хөнгөлөх асуудал бол байх ёстой” гэв.

УИХ-ын гишүүн Б.Пүрэвдорж "Ардчилсан нам төрийн дарамтыг багасгахыг дэмжсээр ирсэн. НӨАТ-ын татварыг 5 хувь, буцаан олгохыг 2 хувь болгох хуулийн төслийг би өргөн барьсан. Татварыг багасгаснаар гаалиар орж ирэх барааны анхны бүрдүүлэлт үнэн зөв болно. НӨАТ-ын 10 хувийг багасгахгүйгээр татварын бааз суурь нэмэгдэхгүй. Иргэдээс санал авахдаа таван хувь гээд маш тодорхой санал асуусан. Үүн дээрээ хууль санаачлах ажлыг хийгээд явах нь зөв" гэлээ.

УИХ-ын гишүүн Г.Тэмүүлэн “Хэрэв төсөв дээр энэ асуудлыг тусгалаа гэхэд хуулийн төсөл боловсруулах ёстой. Ажлын хэсэг гаргаж байгаа нь асуудлыг бүх талаас нь судалж үзээд, шаардлагатай бол бодлогын баримт бичиг боловсруулахаар оруулж ирж байна” гэлээ.

Ийнхүү ажлын хэсэг байгуулах санал хураалт явуулж 12 гишүүн оролцсоноос найман гишүүн дэмжиж тогтоолын төслийг баталлаа.

УИХ-ын намрын чуулган 2023 оны арваннэгдүгээр сарын 1-ны өдөр болох байнгын хороодын хуралдааны хуваарийг хүргэж байна.