"Баавгай болохсон" кино хоёр шагнал хүртжээ

Найруулагч П.Золжаргалын "Баавгай болохсон" уран сайхны кино олон улсын кино наадмаас шагнал хүртжээ. Тодруулбал, Хавайн олон улсын кино наадмын "Нэтпак" холбооны нэрэмжит шагнал, "Лугано" хүний эрхийн кино наадмын үзэгчдийн нэрэмжит шагналын эзэн болсон байна. Киноны уран бүтээлчид энэ жилийн 15 дахь удаагийн "Улаанбаатар” олон улсын кино наадмын монгол кино үзвэрийн шилдгийн шилдгийг шалгаруулах "Хангарьд" шагнал гардуулах ёслолд нэр дэвшиж, "Шилдэг найруулагч" болон "Шилдэг зураглаач", "Шилдэг эвлүүлэгч" гэсэн гурван номинацийн эздээр шалгарсан юм.

Мөн дэлхийн А зэрэглэлийн хамгийн том кино наадам болох Францын Каннын кино наадамд монгол найруулагч П.Золжаргалын "Баавгай болохсон" кино өнгөрсөн дөрөвдүгээр сард албан ёсоор сонгогдож, Франц улсыг зориод ирсэн билээ.

Найруулагч П.Золжаргал өмнө нь киноныхоо тухай ярихдаа "Утаатай, өвлийн хүйтэн улирлыг болдогсон бол баавгай шиг ичээндээ өнгөрүүлэхсэн гэсэн утгатай. Нэг сайхан унтаад сэрэхэд утаагүй, ханиад томуу ч байхгүй, зуныг угтах юмсан гэдэг хүүхдийн хүсэл л дээ. Энэ бол киноны гол дүрийн чин хүсэл. Кинонд маань 15 настай физикийн гоц авьяастай хүү, гэр хороололд өрх толгойлсон ээж, хоёр дүүтэйгээ амьдардаг тухай өгүүлдэг. Тэр хүү өөрийн хүсэл мөрөөдлийнхөө төлөө явангаа хүйтэн өвөл даарахгүй нь тулд нүүрс түлээ, хоол хүнсгүй болох асуудлыг хэрхэн даван туулж байгааг харуулж буй.

Би энэ киноныхоо зохиолыг 2016-2017 оны өвлөөс эхэлж бичиж эхэлсэн. Кино төслөө олон улсын залуу найруулагчдад зориулсан сангийн сургалтуудад оролцож ирсэн.

Хамгийн анх 2017 онд залуу найруулагчдад зориулсан "Talents Tokyo”-д кино зохиолтойгоо оролцож, “Баавгай болохсон” кино төслөө танилцуулан 3000 ам.долларын шагналын сантай уралдаанд түрүүлсэн. Тэндээс би үнэ цэнэтэй түүх бичиж байна гэдгээ ойлгосон гэх үү. Мөн надад кино зохиолоо улам хөгжүүлэх тэтгэлэг олгож, тэнд франц продюсертэйгээ анх танилцсан байдаг. Франц улсын "Urban Sales" компанийн ерөнхийлөгчөөр ажилладаг хүн. Тэр цагаас хойш зургаан жилийн дараа бидний киноны ажил маань дуусч байна" гэдгийг хэлж байсан юм.