Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай болон дагалдах хуулийн төслүүдийг УИХ-д өргөн мэдүүлсэнтэй холбогдуулж, Улаанбаатар хотын захирагч Х.Нямбаатар өнөөдөр /2023.10.31/ сэтгүүлчдэд мэдээлэл хийлээ.

Х.НЯМБААТАР:

-Улаанбаатар хотын гэр хороололд 228 мянга орчим айл өрх амьдарч байна. Гэр хорооллыг орон сууцжуулах ажлыг зургаан дэд төвийн бүтээн байгуулалтад тулгуурлан хэрэгжүүлнэ. Эхний ээлжинд Баянхошуу дэд төв, Сэлбэ дэд төв хоёрыг түшиглэн барилгажуулна.

Баянхошуу дэд төвийн барилга угсралтын ажил эхэлсэн, 800 орчим айлын орон сууц ирэх тавдугаар сард ашиглалтад оруулна.

Сэлбэ дэд төв, Долоон буудлын эцэс, Чингэлтэйн эхний буудал орчимд 158 га газар дээр 2000 айлын нэгж талбай бий. Эдгээр айлуудыг гурван нөхцөлөөр газраа чөлөөлж өгөх боломжтой байхаар зохицуулалтыг хуулийн төсөлд оруулсан. Нэгдүгээрт, иргэд газраа жишиг үнээр буюу бэлэн мөнгөөр худалдах, хоёрдугаарт, түр орон сууцанд орж, дараа нь тухайн байршилд барьсан орон сууцыг өмчлөх, гуравдугаарт, бэлэн орон сууцаар газар, обьектоо солих юм.

Ирэх жилүүдэд эхний удаад  12 мянган айлын орон сууц барьж чадвал Сэлбэ гол дагуух айлуудаа орон сууцуудад оруулаад 700 га газрыг чөлөөлж аван, нийслэл өөрийн эзэмшилд шилжүүлэн, улмаар ААН-д борлуулж, бонд босгосон мөнгөө эргэн төлөх ажлыг хийж байна.

Тохируулгагүй хоёр гол Улаанбаатар хот дотор урсаж байна. Тийм учраас усан санд хуримтлал үүсгэж, бороо ихтэй жил урсгадаг байхаар тохируулга хийнэ.

Зарим талбайг нийтийн эзэмшлийн цэцэрлэгт хүрээлэн байдлаар төлөвлөнө. Үндсэндээ чөлөөлсөн газарт 60 хувь нь орон сууц, 40 хувь нь ногоон байгууламж байхаар цэцэрлэг, сургуультай нь хамт цогцолбор барихаар төлөвлөж байна. Энэхүү цогцолбор нь нийслэлийн хэсэгчилсэн төлөвлөгөөний дагуу баригдах юм. Нийтдээ 700 га газар дээр орон сууц барьж худалдан борлуулах ажлыг хийнэ.

Барилгын материал, тоног төхөөрөмжүүдийг Гаалийн татвараас чөлөөлөх зэрэг тохируулгыг хийнэ.

Мөн зарим ажлыг хийхэд Боловсрол, шинжлэх ухааны яам, Засгийн газартай ойлголцох асуудлууд бий. Тухайлбал, Соёл урлагийн их сургуулийг нүүлгэн шилжүүлж, Сэлбэ дэд төв рүү татахын тулд эхлээд газрыг бэлдэж, төлөвлөлтөд оруулъя гэж байгаа юм. Өдөр бүр 8000-9000 оюутан, багш Улаанбаатар хотын төв рүү орж, сургуульдаа ирдэг. Иймээс тус сургуулийг кампус  байдлаар төлөвлөх боломж байна. Дуурийн театрыг энэ төлөвлөлтөд оруулж ирэх. Газраа чөлөөлсөн айлууд буцаад хуучин газартаа орон сууцанд орлоо гэхэд ажлын байрыг нь давхар шийдэхийн тулд төрийн байгууллага, болоод хувийн ААН-д газар олгож, ажлын байрыг шийдэх шаардлага бий. Ингэж чадвал ажилгүйдлийг ч шийдэх боломж байгаа юм.

Мөн метро байгуулах асуудлаар БНХАУ-ын төрийн өмчит компанийн холбогдох хүмүүстэй бид ирэх арваннэгдүгээр сарын 15-наас хэлэлцээр хийнэ. Хэлэлцээр үр дүнд хүрсэн тохиолдолд метро барьж байгуулах асуудлыг Засгийн газар, УИХ-д оруулж танилцуулах.

Зөвшөөрөл авсан нөхцөлд метроны шугамыг Их тойрууг  тойруулж, Үйлдвэрчний эвлэлийн гудамж, Долоон буудлаас-Яармагийн товчоо хүртэл байхаар төлөвлөж байна.

Ирэх жилийн Улаанбаатар хотын хамгийн том бүтээн байгуулалтын ажил метрогоор эхэлнэ.

Энэ асуудалтай холбоотойгоор гадаадаас зөвлөх үйлчилгээ авах төлөвлөгөөтэй байна. Төсвөт өртгийг бид томоохон байгууллагаар магадлуулах, нягтлуулахар яригдаж байна.

Мөн хуулийн төсөлд Баруун дөрвөн замаас Зүүн дөрвөн зам, 32-ын тойргоос Энхтайваны гүүр хүртэл замыг төлбөртэй бүс болгохоор тусгасан. Хууль батлагдсанаар замын хөдөлгөөний төлбөртэй бүсийн тарифыг шууд тогтоохгүй. Нийтийн тээврийн хүртээмжийг сайжруулсны дараа тарифыг НИТХ тогтоохоор тусгасан. Төлбөртэй бүсийн тариф 0-27000 төгрөг байна. Энэ нь 2000, 5000 төгрөг ч байж болно. Дэлхийн жишгээс харахад төлбөртэй бүс тогтоосноор түгжрэлийг 30 хүртэл хувиар бууруулсан туршлагууд бий.

Замын хөдөлгөөний төлбөртэй бүс дотор амьдарч байгаа иргэдийг тогтоосон тарифаас 90 хувь хөнгөлнө. Бүсийг тойрсон автомашины зогсоолуудыг зөвхөн ажлын цагаар үнэгүй байлгана. Зогсоолын багтаамж хүрэлцэхгүй бол давхар зогсоол болгохоор төлөвлөж байна гэлээ.