2022-2023 оны өвлийн улиралд БНСВУ-ын Фукуок арал нь Монголчуудын зорьж очсон хамгийн эрэлттэй аялал жуулчлалын бүсээр тодроод буй. Далайн эрэг дээрх тансаг зэрэглэлийн ресорт, олон төрлийн тоглоомын парк, казино гээд аялагч бүрийн хүсдэг бүх зүйл энэ арал дээр нэг дор цогцолдгоороо онцлог талтай юм.

Тэгвэл 2023-2024 өвлийн хугацаанд Круиз Тур Монголиа ХХК нь Аэромонголиа ХХК-тай хамтарч Фукуок арал руу захиалгат шууд нислэгийг дахин үйлдэхээр болж хоёр талаас гэрээн дээр гарын үсэг зуралцлаа. Улаанбаатар-Фукуок чиглэлийн захиалгат нислэг нь 2023 оны арванхоёрдугаар сарын 23-ны өдрөөс эхлэх аж. Сонирхуулан дурдахад, тус хоёр компанийн хамтын ажиллагааны хүрээнд Улаанбаатар-Ханой, Улаанбаатар-Фукуок чиглэлд нийт 120 гаруй нислэг 2022 онд үйлджээ.