Цахим спортын хамгийн нэр хүндтэй, шагналын сан өндөр TI буюу “The International”-ийн 12 дахь удаагийн тэмцээн өндөрлөж, Оросын “Spirit” баг “Aegis”-ийг дахин хүртлээ. 2021 онд түрүүлж байсан тэд энэ удаад финалд Европд төвтэй олон улсын тамирчдын цуглуулга “Gaimin Gladiators” багийг 3-0 гэсэн харьцаатай буулган авав.

Ийнхүү “Spirit” баг “The International”-д хоёр удаа түрүүлсэн хоёр дахь баг болж байна. Мэдээж тэднээс өмнө алдарт “OG” энэ амжилтыг бүтээж байсан билээ.

Энэ жилийн “The International”-ийн шагналын сан үлэмж буурсан бөгөөд өнгөрсөн жил 18.9 сая ам.доллар байсан сан энэ удаад 3.1 сая ам.доллар болж, түрүүлсэн баг 1.4 сая ам.долларыг хүртжээ.

“Spirit” багийн бүрэлдэхүүний тухайд Орос болон Украин залуучуудаас бүрдсэн. Оросоос Денис Сигитов /Larl/, Магомед Халилов /Collapse/, Ярослав Найденов /Miposhka/, Украинаас Илья Мулярчук /Yatoro/, Мирослав Колпаков /Mira/ нар бий.