Эрт оройгүй хэзээ нэгэн цагт Путин нас барах ч энэ нь Орост өөрчлөлт авчрахад хангалтгүй гэдгийг Украины Үндэсний аюулгүй байдал, батлан хамгаалахын зөвлөлийн нарийн бичиг Олексий Данилов хэллээ.

Түүний "Focus" сэтгүүлд өгсөн ярилцлагаас сийрүүлбэл: 

"Эрт оройгүй бүгд л нөгөө ертөнцөд одно. Путин ч ялгаагүй. Манай улсын иргэдийн дийлэнх нь, магадгүй 99.9 хувь нь энэ үйл явдал хурдхан болоосой гэж хүсч байгаа. Эрүүл мэндийн байдлаас нь үзвэл ах дүүс гэлцдэг Украин улсад довтлох шийдвэр гаргах үед түүний оюун ухаан зүгээргүй байжээ. Иймэрхүү асуудлыг шийдэхэд галзуу байх шаардлагатай шүү дээ. Тиймээс тэр хэзээ ч сайн эрүүл мэндтэй байгаагүй. Их эзэн түүнийг хэзээ дуудах вэ гэдэг бол цаг хугацааны л асуудал.

Гэхдээ хүмүүс Путины үхэл бүхнийг дуусгавар болгоно гэж бодоод байна. Бид бол тэгж бодохгүй байна. Орчин цагийн Орос орон хүнлэг бус ертөнц болжээ. Тэднийг хүүхэд байхаас нь л бүх дэлхийг үзэн яд гээд заагаад өгчихсөн. Улс дотор нь ямар нэг зүйл болохоо байвал тэрний хариуцлагыг өөр хэн нэгэн хүлээх ёстой болдог.

Гүржид довтолсон 2008 оныг санацгаая л даа. Тухайн үед оросуудын 80-85 хувь нь Гүржийн талаар сөрөг хандлагатай байсан. Гүржүүд оросуудад тэгтлээ үзэн ядуулах юу хийсэн юм бэ. Украины тухайд ч бас, тэд биднийг асар ихээр үзэн ядаж, дэлхийн газрын зурагнаас арчихыг хүсч байна. Бид нэг зүйлийг ойлгох ёстой. Путины үхлийн дараа юмс өөрчлөгдөнө гэж бодож байгаа бол үгүй шүү. Өөрчлөлтийг харахад хэчнээн жил шаардлагатай. Юун түрүүнд тэд бусдыг хайрлаж сурах хэрэгтэй.

Орос одоо дэлхий дахины нухацтай авч үзэх улс байхаа больсон. Хятад улс Оростой холбоотой олон үйл явдлыг зуучилж байна. Тэд субъектив статусаа алдаж байна. Энэ нь хурдацтай үргэлжилж, улам эрчийг авах болно" гэжээ.

Эх сурвалж: UKRAYINSKA PRAVDA