Дуучин Б.Амархүү тэнгэрт байгаа аавдаа зориулж тоглолт хийнэ

ОХУ-ын Буриадын Гавьяат жүжигчин, дуучин Б.Амархүү тэнгэрт байгаа аавдаа зориулан "Бахархал" нэртэй тоглолтоо арваннэгдүгээр сарын 14-нд "UB Palace"-ын концертын их танхимд хийх гэж байна. Түүний аав Б.Борхүү нь Оросын холбооны Буриад улсын циркийг байгуулахад гар бие оролцсон уран бүтээлч юм. Тэрээр сүүлд “Hero entertainment” студийн найруулагчаар ажиллаж, насан эцэслэтлээ урлагтаа үнэнч зүтгэсэн нэгэн.

Ааваараа хөтлүүлэн урлагт хөл тавьсан Б.Амархүүгийн урлагийн замналд аз амжилт, алдаа аль аль нь байсан ч тэр урлагтаа үнэнч байж, үзэгч, сонсогчоо хүндэтгэсээр яваа.

Тэр энэ удаа бахархалт аавынхаа дурсгалыг хүндэтгэн, үзэгч сонсогчидтойгоо дуу хуураар уулзахаар сэтгэл догдлон хүлээж байна. Тоглолтод энэ цагийг эзэлсэн хит дуунууд дуулагдахаас гадна урилгаар “Харанга” хамтлагийн дуучин Ц.Чулуунбат “Хар сарнай” хамтлагийн дуучин С.Амармандах, дуучин Т.Дэлгэрмөрөн, “3 охин” хамтлаг, Дуучин Наагий нараас гадна ОХУ-аас уран бүтээлчид ирж оролцох аж.

Дуучин Б.Амархүү сүүлд ярилцлага өгөхдөө "Аав, ээж хоёр маань намайг урлагийн замыг сонгоход дуртай хүлээж аваагүй. Аав маань урлагийн хүн учраас жаргал зовлонг нь маш сайн мэднэ. Циркийн уран бүтээлчид урт хугацаагаар гадаадад аялан тоглолт хийхээр явна. Одоогийнх шиг улс хоорондын визний асуудал чөлөөтэй байсангүй. Урлагийн хүний амьдрал хэцүү учраас хүүгээ урлагийн замаар явуулах дургүй байсан. Сургуульд байхдаа дууны янз бүрийн тэмцээнд оролцож, шагнал авахаар аав, ээж маань хөөрч баярлаж байгаагаа харуулдаггүй. Би түүнд их эмзэглэж, шар хөдөлнө.

Гэтэл хожим нь надад “Машинд суугаад явахаар арын суудал дээр дуулаад л явдаг хүүхэд байсан. Чи энэ хорвоод дуучин болох зорилготой ирсэн гэдгийг чинь эртнээс мэдсэн. Тиймээс магтаалд ханаад дуулахаа больчих байх гэж бодсон учраас ил цагаан магтаж байгаагүй” гэдгийг хэлж байсан.

Яг намайг хүлээн зөвшөөрсөн цаг үе бол “Народны артист” тэмцээн. Тэр Кремлийн тайзан дээр ОХУ-ын нэр хүндтэй уран бүтээлчид шилдгээр шалгарсан хоёр залуу уран бүтээлчийг танилцуулж, эцэг эхийнх нь нэрийг дуудсан. Тэр мөчид л аав, ээж маань намайг урлагийн хүн болохыг минь хүлээн зөвшөөрсөн юм шиг санагддаг" хэмээн дурсан ярьсан байдаг.