ОХУ-ын ерөнхийлөгч Путины бие муудаж, зүрх нь зогссон гэх мэдээлэл олон улсын зарим хэвлэлд гарсан. Тэгвэл энэ мэдээллийг Кремль үгүйсгэж байна.

Кремлийн хэвлэлийн төлөөлөгч Дмитрий Песков Мягмар гаригт мэдэгдэл хийхдээ "Түүний бүх зүйл сайн байгаа. Энэ бол ээлжит нэгэн худал цуурхал. Орлон тоглогчийн асуудлыг ч бас хэвлэлээр атаархмаар тууштай хэлэлцдэг. Гэвч энэ нь инээд хүргэхээс өөр зүйлгүй юм даа" гэжээ.

Путин аравдугаар сарын 7-нд 71 нас хүрсэн. Тэр өнгөрсөн долоо хоногт Хятадад айлчилсан бөгөөд буцах замдаа Оросын хоёр хотоор дайрчээ.

Орлон тоглогчийн тухай яриаг Путин 2020 онд ярилцлага өгөхдөө үгүйсгэж байв. Гэхдээ олон жилийн өмнө аюулгүй байдлын шалтгаанаар орлон тоглогч ашиглах тухай яригдаж байсан удаатай гэжээ.

Путины бие муудсан тухай мэдээллийг "General SVR" телеграм хаяг анх түгээсэн. Тус хаяг нь 390 мянга гаруй дагагчтай бөгөөд нийгмийн сүлжээн дэх элдэв цуу ярианы гол эх үүсгүүр аж. Оросын Гадаад тагнуулын албаны одоогийн болон хуучны зарим ажилтан уг хаягийг хөтөлдөг гэж үздэг.

Эх сурвалж: THE TELEGRAPH, BUSINESS INSIDER