Газын зурвас, Египетийн хил нээгдсэнээр Бямба гаригт 20 ачааны машин тусламжийн бараа бүтээгдэхүүн дайны бүс рүү нэвтэрсэн. Тэгвэл Ням гаригт дахин 14 ачааны машин Газын зурваст нэвтэрчээ. Гэвч Изралийн Аюулгүй байдлын сайд хэт барууны үзэлтэй Итамар Бен-Гвир тасралтгүй хүмүүнлэгийн тусламжийг шүүмжилж байна. Тэрбээр "Хамас бүлэглэл барьцааны хүмүүсийг суллахыг зөвшөөрсний дараа л хүмүүнлэгийн тусламжийг оруулах хэрэгтэй" гэж твиттертээ жиргэжээ. 

Хүмүүнлэгийн тусламжийн машинууд ирж байгаа ч мөргөлдөөн эхэлснээс хойш Газын зурваст шатахуун огт орж ирээгүй. Эмнэлгийн инкубаторт байгаа 120 нярай хүүхдийн амь нас нөөц үүсгүүрт холбогдсон машинуудаас хамааралтай байгааг албаныхан анхаарууллаа.

Бүс нутгийн эрүүл мэндийн яамнаас мэдэгдсэнээр мөргөлдөөн эхэлснээс хойш нас барагсдын тоо 4651 хүрээд байна. Эндээс 1873 нь хүүхэд, 1101 нь эмэгтэйчүүд, 1677 нь эрэгтэйчүүд байжээ. Нийт амь үрэгдэгсдийн 839 нь Газын зурвасын өмнөд хэсэгт байсан гэв. Түүнчлэн 14245 хүн гэмтэж бэртжээ. Нас барагсдын дунд НҮБ-ын 29 ажилтан байсан бөгөөд тэдний тал хувь нь багш нар аж.

Нас барагсдын цогцос таних ажиллагаа үргэлжилсээр байгаа боловч хэдэн зуун цогцос хэн болох нь тодорхойгүй хэвээр байна. Хохирогчдын бие махбодид учирсан гэмтлээс шалтгаалаад хэн гэдгийг нь тогтооход хүндрэлтэй байгааг Израилийн Шүүх эмнэлгийн үндэсний төв мэдэгдлээ.

Нэмж дурдахад, Нидерландын ерөнхий сайд Марк Рутте, Францын ерөнхийлөгч Эммануэль Макрон нар энэ долоо хоногийн Даваа, Мягмар гаригуудад Израильд айлчилна. Айлчлалын хүрээнд Марк Рутте Израилийн ерөнхий сайд Беньямин Нетаньяху болон Палестины ерөнхийлөгч Махмуд Аббас нартай уулзахаар төлөвлөжээ. АНУ-ын ерөнхийлөгч Жо Байден, Их Британийн ерөнхий сайд Риши Сунак, Германы канцлер Олаф Шольц нар мөн өнгөрсөн долоо хоногт дипломат айлчлал хийжээ.

Эх сурвалж: BBC