Швед улсыг НАТО-д элсүүлэх асуудал урт хугацаанд яригдаж байна. Тэгвэл НАТО-ийн ерөнхий нарийн бичгийн дарга Йенс Столтенберг Пүрэв гаригт Туркт хандаж, Шведийн гишүүнчлэлийг түргэсгэхийг шаардав. Туркийн ерөнхийлөгч Режеп Тайип Эрдоган гурван сарын өмнө Туркийн парламент дахь үйл явцыг хурдасгана гэж мэдэгдсэн билээ.

"Холбоотнууд энэ асуудлыг хурдан ахиулахыг хүсч байна. Швед амласан зүйлээ биелүүлсэн. Одоо бид Шведийн гишүүнчлэлийг батлах шаардлагатай байна" гэж Столтенберг ярьжээ.

ОХУ өнгөрсөн оны хоёрдугаар сард Украинд довтолсны дараа олон жил төвийг сахисан Швед, Финланд улсууд НАТО-д элсэх хүсэлт гаргасан. Тэдний зорилго нь НАТО-ийн нөмөр нөөлөг дор аюулгүй байдлын хамгаалалт хайх явдал байв. Улмаар Финланд улс энэ оны дөрөвдүгээр сард НАТО-ийн 31 дэх гишүүн орон болсон юм. Харин одоо Шведийн гишүүнчлэлийг батлахад Турк, Унгар улсууд саад болж байна.

Шведэд Коран судар шатааж эсэргүүцлийн жагсаал өрнөсөн нь Туркийн дургүйцлийг хүргэжээ. Гэхдээ өнгөрсөн долдугаар сард Литвийн нийслэлд болсон НАТО-гийн дээд хэмжээний уулзалтын үеэр Эрдоган хүлцэнгүй хандаж, Шведийн хүсэлтийг Туркийн парламентад соёрхон батлуулахаар шилжүүлнэ гэдгээ мэдэгджээ. Туркийн парламент зуны гурван сар амраад аравдугаар сарын 1-нд цугласан.

Үүний дараа удаан хүлээгдсэн соёрхон батлах ажил үргэлжлэнэ гэж найдсан ч яг тэр өдөр Анкара хотын Дотоод хэргийн яамны гадаа амиа золиослогч бөмбөг дэлбэлжээ. 

Харин Унгарын хувьд Шведийн гишүүнчлэлийг яагаад эсэргүүцэж буй нь тодорхойгүй. Ерөнхий сайд Виктор Орбан манай улс Шведийн гишүүнчлэлийг батлах сүүлчийн орон биш гэж удаа дараа хэлж байсан. Энэ байр суурь нь холбоотнуудыг гайхшруулж буй. Өнгөрсөн сард ч бас Орбан яарахгүй байгаагаа илэрхийлжээ. Тэрбээр хууль тогтоогчдод хэлэхдээ "Шведийн аюулгүй байдалд юу ч заналхийлээгүй тул Унгар гишүүнчлэлийг батлах гэж яарахгүй байна" гэжээ. 

Эх сурвалж: AP