Хятадын батлан хамгаалахын сайд Ли Шанфу сүүлийн сар гаруйн хугацаанд  олон нийтийн өмнө харагдаагүй. Тэгвэл түүний оронд Хятадын байлдааны ажиллагаа, төлөвлөлт хариуцсан цэргийн байгууллагын дарга генерал Лю Жэнлиг томилохоор болсон тухай таван эх сурвалж мэдээлжээ.

Лю Жэнлигийн томилгоо Бээжин хотод энэ сарын сүүлээр аюулгүй байдлын асуудлаарх олон улсын форумыг зохион байгуулахын өмнө хийгдэх гэнэ. Энэ аравдугаар сарын 29-31-нд болох Шяншань форумд АНУ-ын талаас дэд сайдаа оролцуулахаа мэдэгдсэн бөгөөд хоёр орны харилцаанд том ахиц гэж үнэглэгдэж байгаа.

Ли Шанфу өмнө нь ОХУ-тай байгуулсан зэвсгийн гэрээтэй холбоотойгоор 2018 онд АНУ-ын хориг арга хэмжээнд орсон юм. Харин өдгөө 59 настай Лю Жэнли нь барууны ямар нэгэн хоригт ороогүй. Тэрбээр өдгөө Цэргийн төв зөвлөлийн нэгдсэн штабын даргын албыг хашиж байгаа юм. Харин Лю Жэнлигийн албан тушаалыг нисэх хүчний командлагч Чан Динчю авахаар болсон гэж нөхцөл байдлыг сайн мэддэг гурван хүн мэдэгдэв.

Ли Шанфу яагаад харагдахаа больсныг албан ёсоор тайлбарлаагүй. Харин  Ройтерс агентлаг өнгөрсөн сард түүнийг өмнөх албан тушаалд байхдаа цэргийн техник худалдан авсантай холбоотой авлигын хэргээр шалгаж байгаа гэж мэдээлсэн. Хэрэв Ли Шанфугийн халаа сэлгээ батлагдвал, энэ нь сүүлийн хэдэн сарын дотор солигдсон тус улсын хоёр дахь сайд болох юм. Өмнө нь өнгөрсөн наймдугаар сард Гадаад хэргийн сайд Цин Ганыг албан тушаалаас нь огцруулж, оронд Ван Иг буцаан томилсон.

Ли Шанфу Хятадын төрийн зөвлөлийн таван гишүүний нэг болох албан тушаалдаа хэвээр үлдээх эсэх нь тодорхойгүй байгаа бөгөөд энэ нь ердийн сайдаас дээгүүр албан тушаал юм. Цин Ганыг сайдаас огцруулсан ч албан ёсоор төрийн зөвлөлийн албан тушаалаас нь албан ёсоор буулгаагүй.

Хятадын батлан ​​хамгаалахын сайд нь шууд командлах эрх мэдэлгүй үндсэндээ дипломат үүрэг гүйцэтгэдэг. Энэ албан тушаал нь Цэргийн төв зөвлөлийн цөөн хэдэн албан тушаалтан, тэр дундаа Ши Жиньпиний шууд удирдлаган дор ажилладаг хоёр дэд даргад захирагддаг.

Лю Жэнлигийн томилгоо нь ажлын нэр хүндийг дээшлүүлж чадна гэж таван шинжээч, цэргийн атташе Ройтерс агентлагт ярьжээ. Түүний саяхан Нэгдсэн штабын хэлтсийг удирдаж байсан туршлага нь гадаадын түншүүдэд зүгээр нэг технократ гэхээсээ илүү Хятадын цэргийн ажиллагаа, дайн төлөвлөлтийн төвд байгаа хүнтэй харьцах боломжийг олгоно.

Лю Жэнли нь байлдааны туршлагатай, сүүлийн үеийн Хятадын цэргийн удирдагчдын нэг юм. Тэрбээр 1986 онд Вьетнамын цэргүүдтэй хилийн зурваст ширүүн тулалдаанд оролцож байв. Энэ нь 1979 онд Бээжингээс Вьетнамын хойд хэсгийг эзлэн түрэмгийлсний дараа болсон олон жилийн мөргөлдөөний үргэлжлэл байжээ. 

ЭХ СУРВАЛЖ: REUTERS