Твиттер буюу X сайт дээр Хамас бүлэглэлийн видео бичлэгүүд нийтлэгдэхээс хэрхэн илүү сайн тэмцэх төлөвлөгөөгөө тайлбарлахад Элон Маскад Европын холбооноос 24 цагийн хугацаа өгчээ. Маскийн өнгөрсөн жил худалдаж авсан X сайтыг "Европын холбоонд хууль бус контент, худал мэдээлэл түгээхэд ашиглаж байна" гэж Европын Комиссын гишүүн Тьерри Бретон  мэдэгдэв. Улмаар Маск эсвэл платформ хариу өгөхгүй бол мөрдөн байцаалт явуулж, торгууль ногдуулах талаар тэрбээр  анхааруулжээ.

ЕХ-ны хууль тогтоох, хэрэгжүүлэгч байгууллага болох Европын комиссоос гаргасан мэдэгдэлдээ, Хамасын видео бичлэгүүд сайт дээр тархаж байгаа нь Дижитал үйлчилгээний тухай хууль болон терроризмын онлайн контентын эсрэг зохицуулалтыг зөрчиж байна гэдгийг онцолжээ.

Хамас өнгөрсөн амралтын өдрүүдэд Израильд дайралт хийснээр олон зуун энгийн иргэн амь үрэгдээд байна. Халдлагын талаарх худал, төөрөгдүүлсэн мэдээлэл олон нийтийн мэдээллийн хэрэгслээр өргөн тархсан. Ялангуяа X сайтад баталгаажсан хэрэглэгчийн тэмдэг болоод алгоритмын өсөлтийг авах боломжтой болсноор төлбөр төлдөг хэрэглэгчид  худал хэлэх, хуурамч бичлэг хуваалцах, хуучин эсвэл виртуал бичлэгийг дахин ашиглах зэрэг зөрчлүүд гарах болжээ. Түүнчлэн Маскийн эзэмшил дор тус компани итгэлцэл, аюулгүй байдлын багаа хэд хэдэн удаа цомхотгосон нь дээрх контентуудын хяналтыг сулруулсан байна.

  ЭХ СУРВАЛЖ: NBC NEWS