Улаанбаатар хотыг удирдах үүргийг Удирдах зөвлөлөөсөө аваад байгаа Хууль зүй, дотоод хэргийн сайд асан Х.Нямбаатар сэтгүүлчдийн асуултад дараах хариулт өглөө.

-Улаанбаатар хот анх удаа бонд гаргах гэж байна. Одоогоор бонд гаргахаа хойшлуулсан. Энэ асуудалд та ямар байр суурьтай байна вэ?

-Бондыг Сэлбийг далан дагасан хойноос урагшаа явж байгаа том босоо замыг санхүүжүүлэх, дуусаагүй сургууль, цэцэрлэгийн барилгыг санхүүжүүлнэ.  Бондын хүү цан цохисон өдрөөс тооцогддог учраас барилга угсралтын болон замын ажил эхлэх хугацаагаа сайн тооцож, гаргах нь зөв гэж бодож байгаа.

-Улаанбаатар хотын түгжрэлийг хэрхэн шийдэх вэ. Мөн автобус худалдан авалтыг буцаах уу, яах вэ?

-Улс төрийн шийдвэр гарснаас биш ажлаа хүлээн аваагүй байна. Ажил хүлээн аваагүй байгаа учраас хариуцсан хүмүүстэй нь санал солилцоогүй. Статистик тоон дээр амралтын өдрүүдэд суулаа.

Сүүлийн хоёр жилээр импортын автомашин хэчнээнээр орж ирсэн, түгжрэл хэдэн цагийн үед аль цэгүүд дээр үүсдэг вэ, чагтан түгжээ зэрэгтэй холбоотой статистик тоо харж байна.  Мэдээж хэрэг хамгийн түрүүнд шийдэх ёстой асуудал. Эл асуудлаар Б.Дэлгэрсайхан сайдтай ярилцсан.

Цахилгаан автобус орж ирсэн байгаа юм байна. Гааль дээр дунд оврын хэдэн автобуснууд гаалийн татвар төлөгдөөгүй гэдгээр байж байгаа юм билээ. Энэ бүгдийг эргэж хараад худалдан авах ажиллагааг яаж цуцалж хүчингүй болгох вэ гэдгээ хууль эрх зүйн хүрээнд гаргалгааг нь гаргана.  Дараагийн ээлжинд ямар автобусыг хурдан хугацаанд худалдан авч нийтийн тээвэрт ашиглах вэ.

Нийтийн тээврийн оргил цагийн үед автобуснууд бөөн бөөнөөрөө нэг талдаа гарчихаад байгаа юм билээ. Жигд тардаггүй. Оргил ачааллын үеэр зэрэг нэг газраас хөдлөөд байгаа. Загварчлал хийж, нийтийн тээврийн эргэлтийг яаж тогтмол цаг хугацаагаар ирдэг болгох вэ гэдэг талаар мэдээлэл сонссон.

Нийслэлд худалдан авалттай холбоотой харилцаан дээр нууцлал гэдэг асуудал хэрэгжих ёсгүй. 2022 онд баталсан Нийслэлийн эрх зүйн байдлын тухай хуулиар  харьяа төсөвт байгууллагууд нийтлэг үйлчилгээний зориулалттай тоног төхөөрөмжийг шууд худалдан авалт хийхээр эрх зүйн орчныг нээж өгсөн. Өөрөөр хэлбэл, үйлдвэрлэгчтэй шууд харилцаж худалдан авалт хийх боломжтой. Болж өгвөл худалдан авалтыг нээлттэй явуулах. Дээр нь нийслэл дээр байгаа авлига албан тушаалтай холбоотой, хүнд суртлыг яаж хялбаршуулах вэ, цахимжуулах вэ гээд аль болох олон зүйлийг системтэй л явах ёстой юм билээ. Косметик засвар хийгээд явахгүй, хэцүү. Засагдахад амаргүй. Шийдвэр гарсны дараа хийх ажлынхаа талаар мэдээлэл өгье.