Бүжигчин Б.Болор "Дэлхийн мисс" тэмцээнд оролцоно

"Монголын сайхан бүсгүй-2023” гоо сайхны 16 дахь наадмын алтан эрдэнийн титмийг Үндэсний урлагийн их театрын Дуу, бүжгийн чуулгын гоцлол бүжигчин Б.Болор зүүж, "Дэлхийн мисс" тэмцээнд оролцох эрхээ авсан байна. Үндэсний ялагчийг тодруулах шалгаруулалт аравдугаар сарын 7-нд Хүүхдийн ордонд болжээ. Үндэсний ялагч Б.Болор нь 2018 онд Монгол Улсын консерваторийг бүжгийн жүжигчин мэргэжлээр төгссөн. Тэрбээр 2023 онд СУИС-ийг бүжиг дэглээч, найруулагчаар төгссөн мэргэжлийн бүжигчин бүсгүй гэнэ. Мисс, бүжигчин бүсгүй ирэх арванхоёрдугаар сард Энэтхэг улсад 130 орны гоо бүсгүй өрсөлдөх "Дэлхийн мисс"-ийн тэмцээнд эх орноо төлөөлөн оролцох юм.

Монголын сайхан бүсгүй шалгаруулах наадмын хагас шигшээ шатанд 13 бүсгүй шалгарснаас есөн эрдэнэ тодруулахаас гадна авьяаслаг мисс, оюунлаг мисс, хүмүүнлэг миссийг зарласан байна.

Ийнхүү 1989 оноос зохион байгуулж ирсэн “Монголын сайхан бүсгүй”-г тодруулах 16 дахь удаагийн тэргүүн наадмыг “Монголын эмэгтэйчүүдийн Хатан Эрдэнэ” холбоо, “Miss World” дэлхийн наадмыг зохион байгуулах эрхийг эзэмшигч "Asian Future" компани хамтран анх удаа зохион байгуулж байгаагаараа онцлог болжээ.

"Дэлхийн мисс"-ийн тэмцээн бол олон улсын гоо сайхны тэмцээнүүдээс хамгийн нэр хүндтэй тэмцээн. Анх 1951 онд Их Британийн Эрик Морли зар сурталчилгааны байгууллага зохион байгуулснаас хойш тив, дэлхийн тэмцээн болтлоо өргөжсөн гэдэг. Монгол Улс анх 2005 онд Дэлхийн мисс-д оролцсон эхэлсэн бөгөөд тухайн үед загвар өмсөгч, мисс Б.Хонгорзул эх орноо төлөөлөн оролцсон юм. Харин 2006 онд Э.Сэлэнгэ, 2007 онд Г.Оюунгэрэл, 2008 онд Ч.Ану, 2009 онд Б.Батцэцэг, 2010 онд А.Сарнай, 2011 онд Ө.Буянхишиг нар оролцож байжээ.