Зам тээврийн хөгжлийн сайд С.Бямбацогтын тайлбарласнаар хилийн боомтуудын нэвтрүүлэх хүчин чадлыг нэмэгдүүлэх ачаа тээврийн терминалуудыг байгуулах хүрээнд Гашуун сухайтын боомтод жилд 10.0 сая тонн нүүрс шилжүүлэн ачих хүчин чадалтай чингэлэг тээврийн терминал ашиглалтад оруулжээ. Ингэхдээ   жолоочгүй автомат удирдлага бүхий Эй Жи Ви тээврийг нэвтрүүлж өдөрт 320 гаруй чингэлгээр ачаа экспортлох болсон байна.

Мөн Шивээ хүрэн боомтод чингэлэг тээврийн терминал шинээр ашиглалтад оруулжээ. Монгол Улс нэгдэн орсон Олон улсын Хуурай боомтын конвенцын хүрээнд Замын-Үүд, Улаанбаатар, Алтанбулаг, Цагааннуур, Ховд, Чойбалсан, Сайншанд, Бичигт гэсэн цэгүүдэд хуурай боомт байгуулж, экспорт, импортыг нэмэгдүүлэхээр Дэлхийн банк, НҮБ-ын Ази, Номхон далайн эдийн засаг, нийгмийн комисстой хамтран судалгаа хийх, ТЭЗҮ боловсруулах ажыг эхлүүлсэн байна. Энэ бүхний үр дүнд цар тахлын үетэй харьцуулахад тээврийн зардал 7-8 дахин хямдарсан гэж мэдэгдэв.