АНУ-ын ерөнхийлөгч Жо Байден ирэх сард Хятадын дарга Ши Жиньпинийг Сан-Франциско хотноо хүлээн авах байдлаар хоёр орны төрийн тэргүүн нарын нүүр тулсан уулзалтыг Цагаан ордноос зохион байгуулахаар төлөвлөж байна гэж "Washington Post" мэдээлэв.

Тайвань, Covid-19 тахлын гарал үүсэл, тагнуулын ажиллагаа, хүний ​​эрхийн асуудал, худалдааны тариф зэрэг олон асуудлаас болж дэлхийн хоёр том эдийн засгийн харилцаа сүүлийн жилүүдэд хурцадсан. АНУ-ын засаг захиргаа нь хоёр орны харилцааг тогтворжуулахаар сүүлийн хэдэн сарын турш хичээж байна. Тухайлбал, өнгөрсөн зургадугаар сард АНУ-ын төрийн нарийн бичгийн дарга Энтони Блинкен, өнгөрсөн долдугаар сард Сангийн сайд Жанет Йеллен, өнгөрсөн наймдугаар сард Худалдааны сайд Жина Раймондо нар Хятадад айлчилж, харилцааны асуудлыг хэлэлцжээ. Сүүлд Блинкен Нью-Йоркт Хятадын дэд ерөнхийлөгч Хан Жэн, АНУ-ын үндэсний аюулгүй байдлын зөвлөх Жейк Салливан Мальтад Хятадын Гадаад хэргийн сайд Ван Итэй уулзсан.

Байден, Ши Жиньпин хоёрын сүүлчийн уулзалт 2022 оны арваннэгдүгээр сард Индонезид болсон “Их 20”-ийн дээд хэмжээний уулзалтын үеэр болсон. БНХАУ-ын аюулгүй байдлын дээд агентлаг өнгөрсөн сард мэдээлэлдээ, Байден, Ши Жиньпин нар уулзах эсэх нь АНУ-ын "чин сэтгэлээс" шалтгаална гэсэн юм.

Сан-Франциско хотод ирэх арваннэгдүгээр сард болох Ази Номхон далайн эдийн засгийн хамтын ажиллагааны (АПЕК) дээд хэмжээний уулзалтад Ши Жиньпин оролцож магадгүй. Гэхдээ Ши Жиньпин өнгөрсөн сард  Шинэ Делид болсон Их-20-ийн дээд хэмжээний уулзалтыг алгассан юм.

ЭХ СУРВАЛЖ: REUTERS