Монгуш Айдын дийлдэшгүй байсан ч Сэлэнгэ багаараа сайн байлаа

Монголын үндэсний бөхийн холбооны үндэсний "Pepsi алтан цом"-ын барилдааны хоёрдугаар улирлын нэгдүгээр шатны барилдааны гурав дахь өдөр Сэлэнгэ аймаг, Тува улсын багууд учраа тааран барилдсанаас Сэлэнгэ аймгийн баг 16:9-өөр эхний тойргийн ялалтаа авлаа.

Сэлэнгэ аймгийн багт улсын заан Н.Жаргалбаяр /2/, улсын начин Н.Баярбаатар /4/ аймгийн хурц арслан Д.Төрболд /4/, аймгийн арслан Б.Ганбаяр /4/, аймгийн заан С.Оргилбаатар /1/, дөрөвдүгээр тойргоос сэлгээнд сууж, түүний оронд орж барилдсан аймгийн заан Э.Алтанбаяр /1/ нийт 16 даваа авсан бол Тува улсын багт Тува улсын бөх, аймгийн заан Монгуш Айдын /5/, Тува улсын бөх Кара Сал Седен Очур /0/, Тува улсын бөх Сайын Белек /2/, Тува улсын бөх Куулар Мөнгө – Эртэни /2/, Тува улсын бөх Самдан Бади Маадыр /0/, гуравдугаар тойргоос сэлгээнд сууж, түүний оронд орж барилдсан Тува улсын бөх Туметей Ширижик /0/ нийт 9 даваа авчээ.

Барилдсан бөхчүүд давааны мөнгөө авах бөгөөд ялсан баг таван сая төгрөг, хожигдсон баг нэг сая төгрөгийн шагнал гардав гэж үндэсний бөхийн холбооноос мэдээллээ.

Мөн Кореа Оптик Монголиа ХХК-ний захирал Довдонгийн Гантөмөр Тува улсын бөхчүүдийг дэмжин ивээн тэтгэж оролцсон бөгөөд тав барилдаж, тав давсан Тува улсын арслан, энэ жилийн Багахангай дүүргийн үзүүр бөх, аймгийн заан Монгуш Айдынд “Уран барилдааны шагнал” 500 мянган төгрөгийг гардуулсан гэнэ.