"Бүс ба Зам" санаачилгын хүрээнд БНХАУ-ын дэмжлэгтэйгээр Индонез улс 7.3 тэрбум ам.долларын өртөгтэй анхны өндөр хурдны төмөр замаа нээлээ. Ийнхүү нийслэл Жакарта хотыг эдийн засгийн гол төв болох Бандунгтай холбосон галт тэрэгний өндөр хурдны үйлчилгээг эхлүүлэв. Баруун Жава мужийн төв Бандунг нь Индонезийн "Цахиурын хөндий" гэж алдаршсан.

Уг төмөр замыг Индонез хэлнээс орчуулбал "цаг хэмнэсэн, найдвартай" гэсэн утгатай "Whoosh" гэдэг товчлолоор нэрлэжээ. Хурдны галт тэрэг 142 км замыг туулахдаа 350 км/цаг  хүртэл хурдлах боломжтой. Түүнчлэн уг хурдны төмөр замыг Зүүн Жава мужийн төв, томоохон боомт хот Сурабаяа хүртэл сунгах талаар ярилцаж байна.

Индонезийн ерөнхийлөгч тус улсын замын түгжрэлийг багасгахын тулд "Whoosh" зэрэг төслүүдийг нэн тэргүүнд тавьж хэрэгжүүлснээ онцолжээ. Уг төмөр замыг 2019 онд нээхээр төлөвлөж байсан ч газрын маргаан, Ковид-19 тахал болон 1.2 тэрбум долларын  төсөв хэтрүүлснээс болж хойшилсон байв. Хурдны галт тэргийн төмөр замыг Индонезийн төрийн дөрвөн компани болон Бээжингийн "China Railway International" компаниас бүрдсэн "PT KCIC" хамтарсан компани удирдаж байна.