Тэнгэр баганадсан барилгууд сүндэрлэхийн зэрэгцээ том, том ногоон байгууламж, өндөр модод хотыг чимнэ. Чийглэг уур амьсгалтай хот болоод ч тэр үү барилга байгууламж, зам гүүр дагуу мөлхөө ургамал бүрхсэн харагдана. Өндөр, өндөр гоёмсог барилгыг ногоон байгууламжгүйгээр төсөөлөхийн аргагүй. Хаана барилга барина, тэнд мод, бут битүү тарьжээ. Тэр бол Хятадын зүүн эрэгт орших Шанхай хот. Нарлаг, чийглэг уур амьсгалтай Шанхай Азийн дулаан бүсэд хамаардаг.

Биднийг очиход цаг агаар 28 градусыг зааж, гадаа бүгчим, халуун байлаа. Үе үе нартай бороо шивэрнэ.

Шанхай хот нь нийт 16 дүүрэг, дөрвөн тосгон, 205 хороотой. Нийт 20 сая гаруй оршин суугчтай хот аж. Өөрөөр хэлбэл, Улаанбаатар хотын хүн амын тооноос даруй 10 дахин их төвлөрөл, суурьшил ихтэй гэсэн үг. Тэглээ гээд Улаанбаатар хотынх шиг зам дээр хэдэн цагаар түгжирч, хүн машин хоёр нь багтаж ядан чихэлдэхгүй. Нүд эрээлжлэм зам, сүлжилдсэн гүүрэн бүтээн байгуулалтыг маш сайн төлөвлөж хийсэн нь анзаарагдана.

Шанхай нь агаар, төмөр зам, авто зам, усан замын гэсэн бүх төрлийн тээврийн хэрэгслээр Хятадын бүх хоттой холбогддог бөгөөд Хятадын өмнөд бүсийн зам тээврийн төв зангилаа болсон хот юм.

Хотын төв хэсгээр түрээсийн унадаг дугуй, мопид ярайна. Ялангуяа жижиг мопид иргэдийн өдөр тутмын хэрэглээ болжээ. Хөгшин залуу, эмэгтэй, эрэгтэй гэлтгүй жижиг мопид унаж, замын хөдөлгөөн оролцоно. Хотын замын хөдөлгөөнд унадаг дугуй, мопид, суудлын машин, автобус сүлжилдэж, бие биедээ хүндэтгэлтэй хандана. Тэнд ямар нэгэн стресс бухимдал алга.

Бас нэг анхаарал татсан бүтээн байгуулалт бол Шанхай хотын иргэдэд зориулан барьж буй уул. Энэ хотын газар зүйн онцлогоос хамаарч уул байдаггүй гэдгийг оршин суугчид нь хэлж байв. Уг гар аргаар бүтээж буй хоёр уулыг 2022 оны арванхоёрдугаар сарын сүүлчээс эхлүүүлж, 2024 онд барьж дуусах гэнэ.

Ингэснээр Хятадын хамгийн өндөр гар аргаар бүтээсэн уул болох юм байна.

Иргэдийнхээ эрүүл мэндэд анхаарч, чийрэгжүүлэх зорилготой хоёр уулын нэг нь 48 метр, нөгөө нь 37 метр өндөртэй байх гэнэ. Нийт 240 мянган га талбайг хамрах бөгөөд 5000 ширхэг мод тарьж байгаа аж. Мөн уулыг нүхэлж, 1500 автомашины зогсоол байгуулж, Шанхай хотын музей байгуулахаар төлөвлөжээ.

Шанхай хотын захиргаа хотын соёлын салбарыг дэлхийн түвшинд хөгжүүлэх гурван жилийн төлөвлөгөө баталж, цахим спортыг дэмжсэнээр дэлхийн цахим спортын алдартай хотуудын 3 дугаарт жагссан байдаг.

Шанхай хот өнөөдөр:

• ДНБ 4.47 их наяд юань,

•     Хотын хүн ам 24 сая,
•     14 сая нь Шанхай хотын байнгын оршин суугч,
•     Дундаж наслалт 83.2,

 Шанхай хот олон улсад:

• Дэлхийн санхүүгийн индексээр 7 дугаарт эрэмбэлэгдсэн
• Олон улсын эдийн засгийн төв
• Олон улсын санхүүгийн төв
• Дэлхийн 6 дахь өндөр барилгатай хэмээн бичигджээ.

ОРЧИН ҮЕИЙН УРЛАГИЙН ХОТ БОЛЖЭЭ

Гар аргаар хийсэн гоёл чимэглэл, гоо сайхны бүтээгдэхүүн, амттан, чихэр, цай гээд нүд эрээлжлэм зүйлс өрөөстэй. Гэрэл чимэглэлээр гоёсон хуучны тоосгон байшингууд дунд жижиг жижиг мухлаг ажиллана. Тэнд бүх төрлийн эд зүйлс худалдаалах аж. Энэ бол БНХАУ-ын Шанхай хотод байрлах хамгийн загварлаг "Тянзифан" гудамж. Хуучны барилгыг сэргээн засварлаж орчин цагийн гудамж, урлагийн галерей, бэлэг дурсгалын дэлгүүр болгосон нь энэ.

Тянзифан бол Шанхайн өвөрмөц худалдааны гудамж гэдгээрээ алдартай.

Хуучны "Ши күмэн" барилгын цогцолборыг сэргээн засварласны жижиг, дунд үйлдвэрлэлийн гудамж болгосон байна. Ингэснээр олон уран бүтээлч ажлын байртай болж, гар аргаар хийсэн бүтээлээ жуулчдад худалдаалах боломжтой болжээ.