БНАСАУ цөмийн зэвсэгтэй гүрний статусаа Үндсэн хуульдаа тусгаж, удирдагч Ким Жон Ун "АНУ-ын аюулыг сөрөн зогсохын тулд илүү орчин үеийн атомын зэвсгийг бий болгохыг уриалсан" гэж тус улсын төрийн хэвлэлүүд өнөөдөр мэдээллээ. Хойд Солонгосын парламент өнгөрсөн хоёр хоногт хуралдаж, Үндсэн хуулийн өөрчлөлтийг баталжээ.

"АНУ нь илүү түрэмгий шинж чанартай цөмийн дайны хамтарсан сургуулилалтыг дахин эхлүүлж, стратегийн цөмийн байгууламжаа Солонгосын хойгийн ойролцоо байнга байршуулах замаар манай Бүгд Найрамдах улсад үзүүлэх цөмийн дайны аюул заналхийллээ дээд зэргээр нэмэгдүүллээ” гэж Ким Жон Ун хурлын үеэр хэлжээ.

Тэрбээр Вашингтон, Сөүл, Токиогийн аюулгүй байдлын хамтын ажиллагаа сүүлийн үед эрчимжсэн нь "хамгийн муу бодит аюул заналхийлэл гэж тодорхойлов.

Цөмийн зэвсгийн хөтөлбөрийнх нь эсрэг олон улсын хориг арга хэмжээ авсан ч Хойд Солонгос энэ онд олон тооны пуужингийн туршилт хийж, дээд амжилтыг үзүүлэв. Хойд Солонгосын энэ жил тив алгасагч баллистик пуужингуудыг туршсан бөгөөд энэ сард арми нь "тактикийн цөмийн довтолгоо"-ны загварчлалыг хийсэн юм. Мөн энэ онд хоёр ч удаа цэргийн тагнуулын хиймэл дагуулыг хөөргөх оролдлого хийсэн ч бүтэлгүйтсэн.

Пёньяныг цөмийн зэвсгээсээ татгалзахыг ятгах дипломат оролдлого бүтэлгүйтсэнээр Ким Жон Ун өнгөрсөн жил Хойд Солонгосыг цөмийн зэвсгээс "ухрашгүй" улс гэж тунхагласан юм.

ЭХ СУРВАЛЖ: AGENCE FRANCE-PRESSE