Европын холбоо цагаачлалын бодлогодоо өөрчлөлт оруулахыг зөвшөөрч, хуулийн төслийг хэлэлцэж эхэлсэн. Тэгвэл Германы Гадаад хэргийн сайд Анналена Баербок цагаачлалын их урсгалын үед илүү уян хатан байх төлөвлөгөөг Берлин дэмжихгүй гэж анхааруулав. Европын холбооны гүйцэтгэх байгууллага болох Европын комиссоос цагаачлалын бодлогодоо хямралын зохицуулалтыг хийх гэж байгаад сэтгэл дундуур байгаагаа тэрбээр хэлжээ.

Хэрэв энэ нэмэлт өөрчлөлт батлагдвал Европт 2015 оны цагаачлалын хямрал шиг нөхцөл байдалд илүү уян хатан байх боломжийг олгоно. Хямралын зохицуулалт нь Европын холбооны бусад улс орнуудад дүрвэгсдийг эхлээд бүртгүүлэхгүйгээр Герман руу шилжүүлэх хөшүүргийг бий болгоно гэж Бэербок анхааруулжээ. Энэ нь Германы төрийн салбарын нөөцийг орон нутгийн түвшинд улам хүндрүүлж болзошгүй гэж тэрбээр үзэж байна.

Олон цагаач, дүрвэгч Газар дундын тэнгисийг гатлан ​​өмнөд Европын орнуудад ирж, ихэвчлэн Герман болон хойд зүгийн Европын холбооны илүү цэцэглэн хөгжиж буй орнуудыг зүглэдэг. Европын холбооны одоогийн цагаачлалын дүрмийн дагуу дүрвэгсэд орогнол хүссэн хүсэлтээ анх ирсэн улсдаа өгч хянан шийдвэрлүүлэх ёстой.

Европт жигд бус шилжилт хөдөлгөөн үүссэний дараа 2011 оны Европын цагаачлалын бодлогыг боловсруулжээ. Гэвч 2015 онд Сири, Ирак дахь дайнаас дүрвэсэн сая гаруй цагаачид харьцангуй богино хугацаанд Европын эрэгт бууснаар тогтмол бус шилжилт хөдөлгөөн эрчимжсэн байна.

ЭХ СУРВАЛЖ: DEUTSCHE WELLE