Төмөр замын гармаар нэвтрэхдээ жолооч нар өөрсдийн анхаарал болгоомжгүй үйлдлээсээ болж галт тэргэнд мөргүүлэх тохиолдол нэг бус удаа гардаг.  “Улаанбаатар төмөр зам” ХНН-ийн зүгээс нийслэл болон аймаг орон нутгийн удирдлагатай хамтран төмөр замын гармаар нэвтрэх тээврийн хэрэгсэл, явган зорчигчдын аюулгүй байдлыг хангах зорилгоор ижил бус түвшний огтлолцол бүхий  хонгилон гарцыг барих ажлыг шат дараатай хэрэгжүүлж ирсэн.

Энэ удаа УБТЗ-ын дарга Х.Хэрлэн, Сэлэнгэ аймгийн Засаг дарга Н.Лхагвадорж нарын байгуулсан хамтын ажиллагааны санамж бичгийн хүрээнд хоёр талын хөрөнгө оруулалтаар   Сэлэнгэ аймгийн Сүхбаатар сумын наймдугаар багийн нутаг дэвсгэрт орших төмөр замын 25-р км-ын 1-р зуутад байрлах гармыг ижил бус түвшний огтлолцол бүхий хонгилон гарц болгон өөрчилж барих ажлыг УБТЗ-ын хамт олон богино хугацаанд хийж дуусгалаа. Хөдөлгөөний ачаалал өндөр тус гармыг хонгилон гарц болгон өөрчилснөөр төмөр замын аюултай бүсээр нэвтрэх тээврийн хэрэгсэл, ард иргэдийн аюулгүй байдал бүрэн хангагдаж байгаа юм.