3,415.19
Монголын үндэсний бөхийн холбооноос тэгш тоотой саруудын эхний 14 хоногт "МҮБХ-ны Алтан цомын төлөөх" барилдааныг зохион байгуулахаар болсон. Хоёр дахь удаагийн “Алтан цом”-ын барилдаан ирэх аравдугаар сард эхэлнэ. Бөх сонирхогчдын үзэх дуртай энэ барилдаанд 21 аймаг болон Улаанбаатар хот, Өвөрмонгол, Тувагийн тус бүр нэг баг буюу нийт 24 баг оролцоно.
Алтан цом 2023 барилдаанд барилдах Сэлэнгэ аймгийн багт өөрчлөлт орж Монгол Улсын Арслан Б.Орхонбаяр энэ удаагийн барилдааныг тодорхой шалтгааны улмаас өнжихөөр болсон учир Алтанбулаг сумын харьяат шинэхэн Аймгийн заан Э.Алтанбаяр барилдахаар болсон байна.
“Алтан цом”-ын 2022-2023 оны барилдааны шигшээ найман багт шалгарсан багууд эхний шатны барилдаанд оролцохгүй, шууд дараагийн тойргийн барилдаанд оролцоно. Энэ нь өмнөх улирлын “Алтан цом”-ын барилдааны шигшээд шалгараагүй аймгуудын баг болон Улаанбаатар хот, Өвөрмонгол, Тува улсын багууд буюу 16 баг хасагдах журмаар барилдаж ялсан найман баг нь дараагийн шатны барилдаанд оролцох юм. Хоёрдугаар шатанд шалгарсан 16 багийг хавсралтад заасны дагуу бөхчүүдийн цолонд харгалзсан оноогоор жагсааж, хасагдах шат болон хэсгийн барилдаануудын жагсаалтыг гаргана. Мөн хэсгийн багуудыг дээрх жагсаалтаар дөрвөн хэсэгт хуваан барилдуулж, хэсгээс шалгарсан хоёр баг нь цааш барилдах эрхийг авна. Хэсгийн барилдаанаас шалгарсан найман баг хасагдах журмаар тэргүүн байрын төлөө барилдана.
Тэмцээний шагналын сан мөн багийн ба давааны шагнал хэвээр бөгөөд 1-4 байр эзэлсэн багт 20-200 сая төгрөгийн мөнгөн шагнал дагалдах юм.
Сэлэнгэ аймгийн Таван-Хан бөхийн дэвжээний бүрэлдэхүүн:
1. Монгол Улсын Заан Н.Жаргалбаяр
2. Монгол Улсын Начин Н.Баярбаатар
3. Аймгийн Хурц Арслан Д.Төрболд
4. Аймгийн Арслан Б.Ганбаяр
5. Аймгийн Заан С.Оргилбаатар
6. Аймгийн заан Э.Алтанбаяр
7. Аймгийн Харцага Х.Наранбаяр
