Венесуэлийн ерөнхийлөгч Николас Мадуро өнгөрсөн долоо хоногт Хятадад төрийн айлчлал хийсэн. Айлчлалын дундуур болсон хэвлэлийн бага хурлын үеэр Мадуро хонконгоос ирсэн сурвалжлагчийг англиар биш төрөлх мандарин хэлээрээ харилцахыг хүссэн байна.  Хэвлэлийн бага хурал есдүгээр сарын 13-нд болсон бөгөөд Мадуро сэтгүүлчид хандан "Мандарин хэлээр ярь, англи хэлний орчуулагч энд байхгүй. Энэ бол шинэ ертөнц" гэж хэлжээ.

Түүнчлэн тэрбээр Хятад улсыг хэрхэн биширч гайхдаг талаараа ярьж, "дэлхийн бусад ард түмэн рүү дайрч, давамгайлж, шантааж хийдэггүй, "ноёрхогч бус улс" гэж тодорхойлсон байна.

Мадуро есдүгээр сарын 8-14-ний өдрүүдэд Бээжинд айлчилжээ. Түүний айлчлал  Хятадын хэд хэдэн хотоор үргэлжилсэн бөгөөд  өмнөд хэсэгт байрлах Шэньжэнь хотоор аялж, БНХАУ-ын дарга Ши Жиньпинтэй хийсэн чухал уулзалтаар өндөрлөв.

Ши, Мадуро нар эдийн засаг, худалдаа, аялал жуулчлалын хамтын ажиллагаанд анхаарал хандуулсан хоёр талын хамтын ажиллагааны янз бүрийн баримт бичигт гарын үсэг зуржээ. Тэд мөн улс орнуудынхаа харилцааг "бүх нөхцлийн стратегийн түншлэл" болгон өргөжүүлэхээр тохиролцов.

Бүрэн эрхийнхээ хугацаанд Мадуро Хятадтай бат бөх харилцаа тогтоож, зээл, хандив тусламж, хөрөнгө оруулалт татах зэргээр олон арван тэрбум ам.долларын дэмжлэг авчээ. Хятад улс Венесуэлийн үндсэн зээлдүүлэгч бөгөөд 2010-аад онд Өмнөд Америкийн улсуудад ойролцоогоор 50 тэрбум ам.долларын зээл олгосон байна. Хариуд нь Венесуэл улс газрын тос тээвэрлэх замаар өрөө төлж байна.

Айлчлалын үеэр Мадуро Хятадтай БРИКС-ийн механизм, НҮБ зэрэг олон талт хүрээнд хамтран ажиллах хүсэлтэй байгаагаа дахин илэрхийлэв. Мөн Венесуэл улс дэлхийн худалдааны дэд бүтцийг хөгжүүлэх зорилготой Хятадын "Бүс ба Зам" санаачилгыг идэвхтэй дэмжиж байна гэв.

ЭХ СУРВАЛЖ: NEXT SHARK