Монголын үндэсний худалдаа аж үйлдвэрийн танхим (МҮХАҮТ)-ын сонгууль өчигдөр /2023.09.20/ сүр дуулиантай болж, “Эм Си Эс”-ийн Д.Энхтүвшин ерөнхийлгчөөр сонгогдов. Ерөнхийлөгчид нийт 13 хүн нэр дэвшсэнээс танхимын удирдлагын багийг төлөөлж, гүйцэтгэх захирал Т.Дүүрэн өрсөлдсөн. Гэвч тэрбээр эцсийн мөчид нэрээ татаж, “Эм Си Эс”-ийнхэнд найр тавьсан.

Найр тавьсан түүний үйлдлийг бизнес эрхлэгчид  "Т.Дүүрэн өнөөгийн албан тушаалдаа үлдэх тохироог хийж, нэрээ татсан" гэж үзэж байна. Ерөнхийлөгчийн сонгуульд Д.Энхтүвшин, Т.Дүүрэн нараас гадна эдийн засагч Б.Лакшми, Ш.Отгон-Өлзий, “Алтандорнод Монгол” компанийн захирал Т.Ганболд, "Скайтел", "Мобиком" компанийн захиралаар ажиллаж байсан С.Болор, "Коёотэ" ХХК-ийн захирал Д.Бямбасайхан, “CEO” клубийн ерөнхийлөгч Б.Гантулга, "Эм ти эм сити инженеринг"-ийн  Ш.Мөнхсайхан, "Монгол Даатгал" ХК-ийн гүйцэтгэх захирал Л.Төр-Од, Монголын Үндэсний Олимпын хорооны дэд ерөнхийлөгч О.Одбаяр, "Буян" компанийн захирал Б.Жаргалсайхан нарын 13 хүн нэрээ дэвшүүлсэн.

Хуралдааны үеэр бизнес эрхлэгчид байр сууриа илэрхийлж, ерөнхийлөгчид нэр дэвшигч 13 хүн мөрийн хөтөлбөрөө танилцуулж, ирэх дөрвөн жилд МҮХАҮТ-ыг ямар бодлогоор удирдаж, бизнес эрхлэгчдийнхээ эрх ашгийг хэрхэн хамгаалах талаар олон цаг нухацтай ярилцсан. Түүхэндээ хамгийн олон хүн нэр дэвшсэн учраас өрсөлдөөн ч ширүүхэн өрнөв.