Украины арми Германиас 10 ширхэг Ирвэс-1 танк авахаас татгалзжээ. Учир нь тэдгээр танкинд засвар үйлчилгээ шаардлагатай бөгөөд Украин үүнийг хийх боломжгүй аж.

Польшоос хүлээж авсан Ирвэс танкуудад томоохон засвар үйлчилгээ хийх шаардлагатай болсныг мөн Украин онцолжээ. Танкуудыг шалгуулахын тулд Герман улс мэргэжилтнүүдээ Польшид илгээсэн байна. Украин цэргүүд сургуулилалт хийх явцад Герман дахь танкууд багагүй элэгдсэн гэж дүгнэжээ.

Герман улс энэ оны эхээр Дани, Нидерландтай хамтран Украинд 100 орчим хуучин Ирвэс-1 танк нийлүүлнэ гэж зарласан. Энэ хүрээнд өнгөрсөн долдугаар сард 10 Ирвэс танк илгээсэн боловч ижилхэн асуудалтай байсан. Тус улсын засгийн газар наймдугаар сард дахин 10 танк илгээнэ гэж зарлажээ. Танк эвдэрсэн тохиолдол бүрийн талаар мэдээлэл өгөх боломжгүй ч Украинтай хамтран засварын ажлыг хийж байгаа гэж Германы Батлан хамгаалах яам мэдэгдлээ.

Нэмж дурдахад Дани, Нидерланд улсууд Германы зэвсэг үйлдвэрлэгч "Rheinmetall" компаниас 14 ширхэг Ирвэс-2 танк худалдан авч, Украинд хандивлахаар тохиролцжээ. Нийлүүлэлтийг 2024 оны эхээр гэж төлөвлөж байна. Дани улс мөн 15 ширхэг "T-72EA", 30 ширхэг Ирвэс-1 танкийг нэмэлтээр Украинд илгээхээ мэдэгдлээ. 

Эх сурвалж: THE KYIV INDEPENDENT