“Эрдэнэс Тавантолгой” ХК нь нүүрс тээврийн “С” зөвшөөрлийг олон машинтай гадаадын компаниудад олгодог гэх мэдээллийг тээвэрчдийн төлөөлөл хийгээд буй.

“Эрдэнэс Тавантолгой” ХК-ийн Худалдан авах ажиллагааны газрын дарга Н.Цэрэнсамбуугаас энэ асуудлыг тодруулахад дараах тайлбар хийлээ. Тэрбээр “2023 оны нэгдүгээр улиралд 10 мянга, хоёрдугаар улиралд 11 мянга, гуравдугаар улиралд 14 мянган “С” зөвшөөрлийн хүсэлт ирүүлсэн. Гэвч “Эрдэнэс Тавантолгой” ХК нэг улиралд 4680 тээврийн хэрэгсэлд “С” зөвшөөрөл олгох боломжтой. Тодруулж хэлбэл, хүсэлт гаргасан бүх тээврийн хэрэгсэлд “С” зөвшөөрөл олгож хүрэлцэхгүй учраас хувь тэнцүүлэн олгодог. Ингэснээр хүсэлт гаргасан аж ахуйн нэгжүүдэд ямар нэгэн давуу эрх олгохгүйгээр тэгш хуваарилалт хийдэг. Мөн зөвшөөрөл авсан аж ахуйн нэгж, тээврийн хэрэгслийн бүх мэдээллийг ett.mn сайтад нээлттэй, ил тод байршуулдаг” гэсэн юм.