Цол чимэг олгох бүх цэргийн баяр наадам өчигдөр/2023.09.16/ Архангай аймгийн Цэцэрлэг хотноо боллоо. 32 дахь удаагийн уламжлалт барилдаанд нийт 256 бөх хүч үзэв. Үүнээс Өвөрхангай аймгийн Зүүнбаян-Улаан сумын харьяат, Алдар спорт хорооны бөх Б.Өлзийсайхан найм даван түрүүлж, цэргийн арслан цол хүртжээ. Харин үзүүрт Сэлэнгэ аймгийн Мандал сумын харьяат, Алдар спорт хорооны бөх Х.Наранбаяр үлдэж, цэргийн заан цол хүртсэн аж.

Их шөвөгт Дундговь аймгийн Эрдэнэдалай сумын харьяат аймгийн арслан Н.Амгаланбаатар, Өмнөговь аймгийн Гурвантэс сумын харьяат аймгийн заан Б.Баянсүх нар үлдэв. Тэгвэл дунд шөвөгт Архангай аймгийн Цэцэрлэг сумын харьяат А.Дорждэрэм, Архангай аймгийн Төвшрүүлэх сумын харьяат Т.Лхагвасүрэн, Өмнөговь аймгийн Манлай сумын харьяат Б.Бат-Эрдэнэ, Архангай аймгийн Ихтамир сумын харьяат Д.Төрбаяр нар үлдэн цэргийн цол чимэг хүртлээ.