1. Нийслэлийн Сонгинохайрхан дүүргийн “Ган хийц” үйлдвэрийн хашаанд шугамгүйн улмаас шинээр оруулж ирсэн 50 автобусыг үйлчилгээнд гаргахгүй, хадгалж байна гэх мэдээлэл цацагдсан. Тус мэдээллийн дагуу Нийтийн тээврийн газрын Захиргаа, удирдлагын хэлтсийн дарга З.Цэвээндорж, Зорчигч тээврийн нэгдлийн III компанийн Дотоод хяналт шалгалтын хэлтсийн дарга Л.Отгонбаатар нараас тодруулахад  дараах тайлбар өглөө.

Нийтийн тээврийн газрын Захиргаа, удирдлагын хэлтсийн дарга З.Цэвээндорж “Аливаа авто бааз өөрийн хүчин чадлынхаа 90 орчим хувиар ажиллах нөхцөлтэй. Үүнийхээ дагуу 10-15 автобусыг байнгын бэлэн байдалд байлгадаг. Түүнээс шугамгүйн улмаас автобусыг хадгаллаа гэдэг нь ташаа мэдээлэл” гэв.

Зорчигч тээврийн нэгтгэл III орон нутгийн өмчит компанийн Дотоод хяналт шалгалтын хэлтсийн дарга Л.Отгонбаатар “Яг энэ хэсэг бол манай хоёрдугаар баазын хашаа. Бид энд автобусуудаа өглөө, оройдоо паркладаг. Одоогоор 16 автобус энэ хашаанд байна. Бусад нь шугамдаа, үйлчилгээнд гарсан. Энэ 16 автобусны тухайд, 5 нь техникийн ээлжит засвар үйлчилгээ хийж байгаа бол үлдсэн 11 автобус нөхөн гаралтад буюу бэлэн байдалд зогсож байна. Шинэ автобусыг үйлчилгээнд гаргахын тулд наанадаж 14 хоног паркладаг. Учир нь, дугаар авах, Смарт картын тоног төхөөрөмж суурилуулах, тээврийн гэрчилгээг нь авах гэх мэтэд дээрх хугацааг зарцуулдаг. Магадгүй, автобусныхаа бэлэн байдлыг хангаж байсан тэр үеийн зураг, бичлэгээр нийгмийн сүлжээнд олон нийтэд ташаа мэдээлэл түгээж байгаад харамсаж байна” гэлээ.