ОХУ-ын арми өчигдөр /2023.9.3/  Дунай мөрний эрэг дээрх хүнсний бүтээгдэхүүн экспортлоход ашигладаг Украины боомтын байгууламж руу агаарын цохилт өгчээ. НАТО-гийн хилийн ойролцоох Украины боомтод өгсөн агаарын цохилтын улмаас хоёр хүн гэмтэж бэртсэн талаар орон нутгийн цэргийнхэн мэдээлжээ. Түүнчлэн дэд бүтцэд гарсан галыг богино хугацаанд унтраасан гэж мэдээлэв.

Одесса мужид нэг шөнийн дотор довтлоход 25 нисгэгчгүй онгоц ашигласан бөгөөд 22-ыг нь устгасан гэж Украины Агаарын цэргийн хүчин мэдэгдэв. ОХУ-ын Батлан ​​хамгаалах яам мэдэгдэл хийхдээ, Украины Рени боомт дахь шатахууны агуулахуудыг Украины армид түлш нийлүүлдэг байсан гэж үзэн онилжээ. Оросын мэдэгдэлд довтолгоо амжилттай болж, “тогтоосон бүх байг устгасан” гэв.

Агаарын цохилтын үеэр сум НАТО-гийн гишүүн Румын улсын хилийн дөнгөж цаана унасан нь шүүмжлэл дагуулжээ. Румыны Батлан ​​хамгаалах яам үүнийг "хамгийн хатуу үгээр" зэмлэн буруушаасан байна. Гэхдээ Румын улсын нутаг дэвсгэр, харъяаллын усанд ОХУ-аас шууд аюул заналхийлээгүй гэж мэдэгджээ.

Украины ерөнхийлөгч Владимир Зеленскийн туслах Андрей Йермак Кремлийг уг дайралтуудаар “хүнсний хямрал” үүсгэхийг оролдсон гэж буруутгав. Тэрбээр "Оросын террористууд дэлхийг хүнсний хямрал, өлсгөлөнг өдөөж чадна гэж найдаж боомтын дэд бүтцэд халдсаар байна" гэж мэдэгджээ.

Украины үр тариа тээвэрлэх хөлөг онгоцууд Хар тэнгисийн боомтуудын Оросын бүслэлтийг тойрч, дэлхийн зах зээлд гарахын тулд Туркийн Босфорын хоолой руу усан замаар аюулгүй нэвтрэх боломжийг олгосон хэлэлцээрээс өнгөрсөн долдугаар сард ОХУ нь гарсан. Хэлэлцээр дууссан нь дэлхийн хүнсний бүтээгдэхүүний үнийг өсгөж, буурай орнуудад хүнсний хямрал, өлсгөлөн үүсгэнэ гэсэн болгоомжлолыг төрүүлсэн. Тэгвэл Турк улс нь зуучлагчийн үүрэг гүйцэтгэн шинээр хэлэлцээр байгуулахыг хичээж эхэлжээ.  Эрдагон Даваа гаригт Хар тэнгисийн амралтын Сочи хотод Путинтэй уулзаж, үр тарианы хэлэлцээрийг сэргээх талаар ярилцана. 

ЭХ СУРВАЛЖ: CNN