Драгоны галын шалтгааныг тогтоогоогүй байна

Нийслэлийн Сонгинохайрхан дүүргийн 29 дүгээр хороонд байрлах Драгон худалдааны төвийн шилэн барилгад наймдугаар сарын 21-нд гал гарч их хэмжээний хохирол учирсан. НОБГ-ын аврах, гал унтраах баг газар дээр нь ажиллаж галыг хурдан хугацаанд бүрэн унтраасан ч худалдаа эрхлэгчдийн хохирлын хэмжээ их байгаа. Тус үйл явдлыг худалдаа эрхлэгчдийн зүгээс санаатай гэж үзэж байгаа талаар бид өмнө мэдээлсэн.

Одоогоор Драгон худалдааны төв хэвийн ажиллаж байгаа бөгөөд галын шалтгаан нөхцөлийг эцсийн байдлаар тогтоогоогүй байна.

Тус терминал худалдаа үйлчилгээний төвийн мэдээлснээр "Барилгын зүүн хэсэгт гэнэтийн хүчин зүйлээс шалтгаалан гал гарсан. Үүний улмаас түрээслэгчид болон компанид тодорхой хэмжээний хохирол учирсан бөгөөд бидний зүгээс шаардлагатай засвар үйлчилгээг цаг алдалгүй хийж гүйцэтгэн ажиллаж байгаагаа үүгээр мэдэгдэж, нийт түрээслэгчдээсээ зайлшгүй хүчин зүйлээс үүдэн гарсан нөхцөл байдлын өмнөөс уучлалт хүсч байгаагаа илэрхийлж байна. Бид цаашдын үйл ажиллагаагаа улам өргөжүүлэн тэлж, нийт түрээслэгчдийнхээ эрх ашгийг дэмжсэн төслүүдийг бодитоор хэрэгжүүлсээр байх болно" гэсэн юм.

Харин худалдаа эрхлэгчдийн зүгээс нэг өдөр "Даргон" төвийг нүүлгэн шилжүүлэхээр болсны цаана хэн нэгний ашиг сонирхол байгаа гэдэгт худалдаачид баттай итгэлтэй байгаа аж. Эрх мэдэлтнүүд энгийн иргэдийнхээ амьдралд хошуу, гар дүрдгээс болоод ийм байдалд орлоо гэж тэд бухимдана. Тэдний ихэнх нь зээлтэй. Тиймээс зээлээ яаж төлнө гэсэн хүмүүс ч цөөнгүй. Эхний ээлжинд галын дүгнэлтийг хурдан шуурхай, шударга гаргах хэрэгтэйг ч тэд сануулж байв. Галын дүгнэлт гарах гэж сар болдог, гарсан хойноо хохирлыг нь хэн барагдуулах нь тодорхойгүй уддаг. Тиймээс ашиг орлогоо алдсан тэдний хувьд галын дүгнэлтийг л хүлээж сууна гэдгийг хэлж байлаа.