Олон улсын эрүүгийн шүүхээс өнгөрсөн гуравдугаар сард ОХУ-ын ерөнхийлөгч Владимир Путиныг баривчлах шийдвэр гаргасан нь түүний хөлийг тушсан. Улмаар өнгөрсөн долоо хоногт Өмнөд Африкт болсон БРИКС-ийн чуулган гэх мэт томоохон хурлуудад биечлэн оролцож чадаагүй юм. Мөн ирэх сард Энэтхэгт болох "Их-20" бүлгийн чуулга уулзалтад ч оролцохгүй гэдгээ мэдэгдсэн.

Тэгвэл тэрбээр уг шийдвэрээс хойших анхны гадаад айлчлалаа Хятад улсад хийхээр төлөвлөж байна. Путин ирэх аравдугаар сард болох Хятадын "Бүс-Зам" олон улсын форумд оролцох гэнэ.

Үүнээс өмнө Хятадын дарга Ши Жиньпин өнгөрсөн гуравдугаар сард Москвад айлчилсан. Путин, Ши Жиньпин нар хоёр орны хооронд хязгааргүй нөхөрлөлийг зарласан ч Путин өнгөрсөн оны хоёрдугаар сард ОХУ-аас хөрш Украинд дайн эхлүүлсэн нь Ши Жиньпинийг барьц алдуулах дөхсөн. Гэхдээ Хятад улс нь хоёр талд тэнцвэрийг сайн хадгалж, дайныг зогсоох энхийн гэрээний санаачилгыг эхлүүлсэн.

ЭХ СУРВАЛЖ: THE NEW YORK TIMES