Гүржийн салан тусгаарласан мужуудыг ОХУ-д нэгтгэх боломжтой

Гүржийн салан тусгаарласан Өмнөд Оссетиа, Абхазиа мужуудыг ОХУ өөртөө нэгтгэх боломжтой гэж Кремлийн Аюулгүйн зөвлөлийн дэд нарийн бичгийн дарга Дмитрий Медведев хэлэв.

Украин дахь дайн эхэлснээс хойш ОХУ-ын ерөнхийлөгч асан Дмитрий Медведев нь Москвагийн улс төрийн хамгийн хурц дуу хоолой болсон. Тэрбээр Гүржийн НАТО-д элсэх боломжийн талаар авч хэлэлцэж, байдлыг хурцатгасан гэж барууныхныг буруутгажээ. “ОХУ-д нэгдэх гэдэг санаа Абхазиа болон Өмнөд Оссетиад их түгээмэл байдаг. Хэрвээ тохироо нь бүрдвэл үүнийг хэрэгжүүлэх бүрэн боломжтой.

Хэрвээ НАТО-д элсэх асуудал бодит байдалд ойртвол ОХУ арга хэмжээ авахаас буцахгүй” гэж тэр хэвлэлд ярилцлага өгсөн байна.

Гүржийн эрх баригчид НАТО-д элсэх тухай удаа дараалан дуугарсан бөгөөд энэ нь нутаг дэвсгэрийнхээ бүрэн бүтэн байдлыг хангах цор ганц арга зам гэж үзэж буй. НАТО ч бас өөрсдийн албан ёсны цахим хуудастаа “Гүрж бол НАТО-ийн хамгийн ойрын түншүүдийн нэг. Тэд холбоонд элсэхийг эрмэлздэг. Өнгөрсөн хугацаанд НАТО, Гүржийн хооронд өргөн цар хүрээтэй практик хамтын ажиллагаа байсан” гэж бичжээ.