CNN телевизийн хөтлөгч Ерөнхийлөгч асан Ц.Элбэгдоржтой уулзжээ

CNN телевизийн олон улсын бизнесийн сэтгүүлч, "Quest Means Business" нэвтрүүлгийн хөтлөгч Ричард Квест наймдугаар сарын 15-нд Монгол Улсад хүрэлцэн ирсэн. Тэрбээр өнөөдөр /2023.08.19/ нутаг буцахын өмнө Ерөнхийлөгч асан Ц.Элбэгдоржтой уулзсан байна.

Ричард Квест нь 1985 оноос эхлэн ВВС телевизэд ажиллаж эхэлсэн бөгөөд 1989 оноос эхлэн Хойд Америк хариуцсан сэтгүүлчээр ажиллаж байсан туршлагатай бөгөөд CNN телевизийн нүүр царай болсон хөтлөгч, сэтгүүлч юм.

Монгол Улс бол түүний аялж буй 95 дахь орон юм. Монгол дахь аяллаа Тэрэлжид морь унаж эхлүүлснээ тэр цахим сүлжээндээ нийтэлжээ. “Миний Монгол дахь аялал алдарт монгол морьдын тусламжаар үргэлжилж байна. Эрс тэс цаг агаарт сайн дасаагүй л байна. Мориор өдөрт 45 км газрыг туулах боломжтой юм байна” гэж тэр бичжээ.

Тэрбээр монгол морьдыг “Хурдтай, хүчтэй, дэлхийн хоёрдугаар дайны үед германчуудын эсрэг тулалдахад хамгийн шилдэг морьд байсан” гэж тодорхойлсон.

Мөн тэрбээр замын түгжрэлийн талаар ч твиттертээ жиргэсэн байна. “Замын түгжрэл аймшигтай байна. Монгол Улс 3.3 сая хүн амтай. Бүгдээрээ зам дээрээ гараад ирсэн бололтой” гэж жиргэж байв.