Япон, Хятадын анимейшний ертөнцийн шилдэг мэргэжилтнүүдийн төлөөлөл Монгол Улсад ирээд байна. Тэд өөрсдийн туршлагаа хуваалцахаар өчигдөр /2023.08.18/ "Black box" театрт анимэ, анимэйшн, манга, комик, тоглоом хийдэг залуу уран бүтээлчидтэй уулзаж, санал бодлыг нь сонслоо.

Комик гэхээр хүүхдэд л зориулсан зурагтай ном л гэж ойлгох нь элбэг. Үүгээр Монголд энэ салбар ямархуу түвшинд хөгжиж байгааг шууд тодорхойлж болохоор.

Комик урлаг Монголд дөнгөж хөгжиж эхэлж байна. Тэр утгаараа хүний нөөц дутмаг байгааг салбарынхан хэлж байна. Тиймээс гадаадын мэргэжилтнүүд энэ салбарт олон улсын сургууль байгуулах боломжийг судалж байгааг хэлсэн юм.

“Анимэйшн, комик, видео тоглоомын чиглэлээр үйл ажиллагаа явуулдаг монгол залуус цөөхүүлээ гэлтгүй дэлхийн хэмжээнд хүрэхүйц ур чадвартай ажиллаж, уран бүтээл туурьвиж байна. Нэг студид зөвхөн нэг чиглэлээр дагналгүй анимэйшн, тоглоом, комик, дуу, видео гэх мэтчилэн олон чиглэлийн ажил хийж чадаж байгааг хараад их гайхаж биширлээ” хэмээн Япон улсын мэргэлжилтнүүд үнэлсэн юм. Ингээд мэргэжилтнүүдийн байр суурийг хүргэе.

"МОНГОЛД ОЛОН УЛСЫН СУРГУУЛЬ БАЙГУУЛАХААР СУДАЛЖ БАЙНА"

“Еconte” компанийн хамтран үүсгэн байгуулагч, ерөнхий продюсер Э.Тамир:

-Сүүлийн үед Монголд анимэ, анимэйшн, комик, тоглоом эрчтэй хөгжих шатандаа явж байна. Гэхдээ Монгол Улсад энэ салбар шинэ тутам хөгжиж байгаа учраас хүний нөөц дутмаг байдаг. Тийм учраас Япон, Хятадын профессоруудыг Монголд урьж, энэ салбарт олон улсын сургууль байгуулахыг зорьж ирсэн.

Тэр утгаараа энэ салбарын залуустай уулзан зовлон жаргалыг нь сонсч, өөрсдийн туршлагаасаа хуваалцлаа. Залуус уулзалтад идэвхтэй оролцож, салбарынхаа хөгжлийн гарц, гаргалгааг хэлэлцлээ.

Монголд ШУТИС, СУИС-иудад тодорхой хэмжээний боловсон хүчнийг бэлтгэж байгаа. Гэхдээ зохиол, дүр бүтээх хүртэлх мэдлэг боловсролыг хараахан олгож чадахгүй байгаа учраас аль болох олон улсын түвшний боловсон хүчин бэлтгэх зорилготой гадаадын мэргэжилтнүүд хүрэлцэн ирсэн юм.

"МЭРГЭЖЛИЙН СТУДИ, УРАН БҮТЭЭЛЧИД ХАМТРАН АНИМЭЙШНЫ ХОЛБОО БАЙГУУЛНА"

Комикс зохиолч, зураач, Соёлын элч Н.Эрдэнэбаяр:

-Монголын "Эконтэ" ХХК сүүлийн 10 гаруй жилийн хугацаанд Японы олон мэргэжилтэнг Монголд урилгаар авч ирж буй. Тэднийг авч ирэх болгондоо салбарынхаа залууст мэдлэг, мэдээлэл өгөх ажлыг зохион байгуулдаг. Энэ удаа ирсэн хоёр зочин маань шилдэг мэргэжилтнээс гадна судалгааны ажил хийдэг профессорууд байгаа.

Тэдний хувьд Монголын залуусыг Япон улсад энэ чиглэлээр суралцуулах, Монголд энэ чиглэлээр сургууль байгуулах ямар боломж байгааг судлахаар ирсэн.

Эдгээр мэргэжилтнүүдийн хувьд Монголд комик, анимэ салбар Хятад улсад 20 жилийн өмнөх шиг байна гэдгийг хэлж байна. Цаашдаа эрчимтэй хөгжих боломжтой гэсэн. Соёлын бодлогын тэргүүлэх таван чиглэлийн нэг нь дижитал медиа орж буй. Тэр утгаараа мэргэжлийн студи, уран бүтээлчид хамтран анимэйшны холбоо байгуулахаар ярилцсан.

"МОНГОЛЫН КОМИК, АНИМЭЙШНЫ САЛБАР ХЯТАД УЛСЫН 20 ЖИЛИЙН ӨМНӨХ ШИГ БАЙНА"

Японы "Yoyogi animation" сургуулийн тэнхимийн эрхлэгч Курита Такуяа:

-Монголчуудын хувьд анимэ, комик, манга урлагийн үндэсний дүрийг хөгжүүлэхийн тулд маш их цаг хугацаа хэрэгтэй. Мөн хэчнээн сайн дүр бүтээсэн ч гэсэн томоохон хамтрагч компаниудтай хамтран ажиллах нь чухал. Япон улс анимэ дүрийг гаргаж ирж, таниулахдаа агаарын тээвэр, төмөр замын компаниудтай хамтарч ажилладаг. Тэгснээр дүр маань олны танил болж, хөгждөг.

Монголын комик, анимэйшны салбар Хятад улсын 20 жилийн өмнөх хөгжлийн түвшинтэй ойролцоо байна.

Монголын уран бүтээлчид цөөн мөртлөө өндөр түвшинд ажиллаж, салбараа хөгжүүлж байгааг харахад сайхан санагдлаа. Япон улсад 2016 оны судалгаагаар 300 орчим анимэйшныг судлахад 60-70 хувь нь манга суурьтай байсан. Монголын залуус өөрсдийн дуртай төрлөө уран бүтээл болгохоор хөгжүүлж байгаа бол япончууд аль манга сайн байна тэрийг хайж эхэлдэг. Мэргэшсэн манга сэтгүүл Япон улсад 100 орчим хэвлэгддэг бөгөөд ихэнх нь хар цагаан өнгөтэй байдаг.

"ДЭЛХИЙН ЗАХ ЗЭЭЛД ЯПОН, АНУ, ХЯТАДЫН АНИМЭ ДҮР ТЭРГҮҮЛДЭГ"

Японы анимэйшн судлалын нийгэмлэгийн гишүүн, салбарын профессор, уран бүтээлч, багш Ши Такаши:

-Орчин цагт анимэ, комик, манга урлагийн платформ хөгжүүлэх амар болсон. Гэхдээ платформ байгуулах нэг хэрэг. Тэрийг ашиглах мэргэжилтнүүдийг бэлтгэж, сургах нь маш чухал асуудал. Шинэ систем нэвтрүүлэхэд хэрэглэж сурах нь чухал ч тухайн хэрэглэгчийн зан үйл, амьдралын хэвшлийг судалж, нийцсэн платформыг хөгжүүлэх шаардлагатай.

Дэлхийн зах зээлд Япон, АНУ, Хятадын анимэ дүр тэргүүлж, өрсөлддөг.

Хэдийгээр Монгол Улс хүн ам цөөн ч үүнд тохируулж, анимэйшныг хөгжүүлэх боломж бий. Миний хувьд Хятад улсын иргэн. Өнгөрсөн 15 жилийн хугацаанд Японы манга, анимэйшн салбарын хөгжлийг Хятад улсын зах зээлд нутагшуулах чиглэлээр ажилласан.

Гэрэл зургийг О.Болорсувд