АНУ-ын “CNN” телевизийн мэдээний хөтлөгч, олон улсын бизнесийн сэтгүүлч Ричард Остин Квест наймдугаар сарын 15-нд Монгол Улсад хүрэлцэн ирсэн. Тэрбээр долоо хоногт таван удаа гардаг “Quest Means Business” нэвтрүүлгийн хөтлөгч бөгөөд “Business Traveller”, “The Express”, “Quest’s World of Wonder” зэрэг хэд хэдэн шоунд ажилладаг.

Монгол Улс бол түүний аялж буй 95 дахь орон юм. Монгол дахь аяллаа Тэрэлжид морь унаж эхлүүлснээ тэр цахим сүлжээндээ нийтэлжээ. “Миний Монгол дахь аялал алдарт монгол морьдын тусламжаар үргэлжилж байна. Эрс тэс цаг агаарт сайн дасаагүй л байна. Мориор өдөрт 45 км газрыг туулах боломжтой юм байна” гэж тэр бичжээ.

Тэрбээр монгол морьдыг “Хурдтай, хүчтэй, дэлхийн хоёрдугаар дайны үед германчуудын эсрэг тулалдахад хамгийн шилдэг морьд байсан” гэж тодорхойлсон.

Мөн тэрбээр замын түгжрэлийн талаар ч твиттертээ жиргэсэн байна. “Замын түгжрэл аймшигтай байна. Монгол Улс 3.3 сая хүн амтай. Бүгдээрээ зам дээрээ гараад ирсэн бололтой” гэжээ.